Спартыўная падзея, якую чакаюць шматлікія футбольныя балельшчыкі. Нацыянальная зборная Беларусі напярэдадні двух важных матчаў новага турніру Лігі нацый УЕФА. Выйграўшы лігу D, нашы футбалісты змогуць трапіць на чэмпіянат Еўропы - 2020. Для пачатку ж трэба стаць першымі на групавым этапе. Трэці матч з шасці са зборнай Люксембурга будзе згуляны сёння.
На сустрэчы будзе працаваць наш карэспандэнт Аляксандр Ярмаш.
У зборнай Беларусі зараз сапраўды вельмі важны момант. Рэч у тым, што два кастрычніцкія матчы - заключныя хатнія ў дэбютным розыгрышы Лігі нацый, і нашай камандзе трэба абавязкова перамагаць і Люксембург, і Малдову.
Пакуль, вядома, у гульцоў усе думкі аб найбліжэйшай сустрэчы. Да яе зборная рыхтавалася ў Мінску з панядзелка. А сёння ў 21:45 на стадыёне "Дынама" беларусы згуляюць супраць Люксембурга.
Каманда з "карлікавай дзяржавы" - нязручны сапернік для нашых хлопцаў. У мінулым адборы на чэмпіянат свету - 2018 апанент так і застаўся непераможаным. Зрэшты, гэты факт дадасць спартыўнай злосці беларускім футбалістам.
Матываваць павінна і адставанне каманды Ігара Крывушэнкі ад саперніка ў турнірнай табліцы: Люксембург атрымаў дзве перамогі на старце турніру, наша зборная страціла два ачкі ў Малдове.
У зборнай Беларусі ёсць выдатны шанец пазмагацца за выхад на чэмпіянат Еўропы - 2020. Як вядома, вялікія справы пачынаюцца з малых.
Заклікаю балельшчыкаў дапамагчы камандзе сваёй падтрымкай на стадыёне або ля экранаў тэлевізараў. "Беларусь 5" пакажа матч супраць Люксембурга ў прамым эфіры ў 21:45.