БАТЭ зноў там, дзе марыць апынуцца кожны паважаючы сябе футбольны клуб Еўропы. Напярэдадні позна вечарам барысаўчане забяспечылі сабе ўдзел у групавой стадыі самага прэстыжнага турніру Старога Свету - Лізе чэмпіёнаў. Акрамя вялікіх фінансавых бонусаў каманда Аляксандра Ермаковіча атрымае магчымасць зноў пазмагацца з лепшымі клубамі свету. Сапернікі БАТЭ ужо вядомыя. Меш як дзве гадзіны таму ў Манака завяршылася жараб'ёўка турніру.
Пра ўсё падрабязна распавядзе Павел Капуцкі. Чэмпіёны Ірландыі, Венгрыі і вось зараз Сербіі. Шлях БАТЭ ў кваліфікацыі не мог быць простым у прынцыпе - ва ўсіх сапернікаў псіхалогія пераможцаў. Напярэдадні лепшаму клубу Беларусі заставалася зрабіць апошні крок. Утрымаць у Бялградзе перавагу над "Партызанам", здабытую тыдзень таму дома, 1:0. І калі ў сярэдзіне першага тайма вылучыўся Стасевіч, шматлікае стала зразумела. Сербам трэба было забіваць тройчы.
Ён нарадзіўся ў Барысаве і гуляў за БАТЭ, калі каманда ўпершыню выходзіла ў Лігу чэмпіёнаў. Сем гадоў таму. Потым у кар'еры Ігара Стасевіча былі расійская "Волга", "Гомель" і мінскае "Дынама". У гэта міжсезонне паўабаронца вярнуўся дадому і стаў героем матча з "Партызанам".
Сербы змаглі адыграць два мячы і зраўнаваць лік па суме двухраўндавага супрацьстаяння, але гасцявы гол Стасевіча стаў ключавым.
У гэтай лігачэмпіёнскай кампаніі жоўта-сінія ўжо зарабілі 14 мільёнаў 700 тысяч еўра. Кожная перамога на групавым этапе прынясе яшчэ паўтара мільёна. Нічыя ацэньваецца ў 500 тысяч. Усяго ў еўракубках з 2008 года БАТЭ зарабіў 70 мільёнаў еўра. Сума для беларускага футбола фантастычная.
На гэта ў Беларусі здольны толькі БАТЭ - дапамагаць заводу. Звычайна ўсё наадварот: прадпрыемствы фінансуюць спартыўныя каманды. 14 мільёнаў еўра - сума, што больш як удвая перавышае гадавы бюджэт барысаўчан. Зрэшты, клубу прыйдзецца выдаткавацца і на свае патрэбы. У гульне з "Партызанам" траўму атрымаў нападаючы Віталь Радзівонаў. Калі дыягназ - разрыў крыжападобных звязак - пацвердзіцца, ён акажацца па-за футболам да канца сезона.
І сёння ў Манака БАТЭ даведаўся пра сваіх сапернікаў па групавым раўндзе. Мы трапілі ў квартэт І. Італьянская "Рома". "Баер" з Леверкузена. І, увага, другі раз у гісторыі ў Беларусь прыедзе адна з лепшых каманд стагоддзя - "Барселона".
У 2011 годзе барысаўчане двойчы моцна саступілі каталонцам з агульнай розніцай мячоў 0:9. Тады галоўным трэнерам быў Віктар Ганчарэнка. У Аляксандра Ермаковіча ёсць шанц палепшыць статыстыку.
Усе шэсць матчаў кваліфікацыі і жараб'ёўку асноўнага раўнда ў прамым эфіры паказвалі каналы Белтэлерадыёкампаніі. На групавой стадыі нічога не зменіцца. З пачатку восені і да пачатку зімы глядзіце самыя яркія паядынкі еўрапейскага футбола. БАТЭ зноў стаў удзельнікам вялікага свята пад назвай Ліга чэмпіёнаў.