Запомніцца адыходзячы тыдзень і феерычным трыумфам першай ракеткі Беларусі Арыны Сабаленкі ў кітайскім Ухане. Сёння яна стала чэмпіёнкай вельмі прэстыжнага турніру. Другі ў кар'еры тытул - гэта плюс 4 пазіцыі ў рэйтынгу і паўмільёна долараў прызавых. А шлях да гэтай перамогі для Арыны складаўся няпроста. Суперніцы ўсе як на падбор, але з кожнага матча беларуска выходзіла пераможцай. У фінале ўсё атрымалася больш проста. Усяго гадзіна і 14 хвілін спатрэбіліся Арыне, каб у матчы за тытул перайграць Анет Кантавейт. Алена Гарэльчык - аб трыумфе беларускага тэніса.
Турнір ва Ухане - з серыі "Прэм'ер 5". Тут прызавыя не менш як 2 з паловай мільёны долараў, вышэй па статусе толькі "Прэм'ер Мендэторы", Вялікі шлем і, бадай, выніковы. Сетка ва Ухане да беларускі Арыны Сабаленкі была бязлітасная. Суарэс Навара, Світоліна, Барці - тэнісісткі, з якімі гуляць нялёгка. Калі не атрымлівалася, Арына ўжо па традыцыі вяла размову са сваім трэнерам Дзмітрыем Турсунавым.
І так "стэп бай стэп" дайшла да фіналу. Суперніцай па матчы за тытул у Арыны стала Анет Кантавейт. Тэнісісткі раней у асабістых матчах не сустракаліся, але абедзве ўпэўнена ідуць да вяршыні сусветнага рэйтынгу. Букмекеры і спецыялісты адназначна назвалі фаварытам гэтага матча менавіта Сабаленку. І не памыліліся. Практычна ў пачатку першага сэта беларуска ўзяла падачу суперніцы. Праўда, пасля невялікай памылкі пакарала сваю ракетку, але давяла партыю да перамогі - 6:3. Па традыцыі ў перапынку запрасіла на корт Турсунава.
У другім сэце доўгачаканы брэй прынёс, як любяць гаварыць тэнісісты, сёмы, які шмат у чым вызначае розыгрыш. Матчбол у Сабаленкі здарыўся таксама на падачы суперніцы. Свой шанец Арына не выпусціла і прыгожым ударам паставіла кропку. Здаецца, фінал стаў самым простым для Сабаленкі матчам на турніры.
Пакуль Арына рыхтавалася да цырымоніі ўзнагароджання, яе старонка ў "Інстаграм" папаўнялася радаснымі водгукамі балельшчыкаў. Здавалася, у тым, што сёння перамога будзе за беларускай, не сумняваліся ні на радзіме, ні ў далёкім Кітаі.
Арына Сабаленка, пераможца тэніснага турніру ва Ухане: "Заўсёды рада вяртацца сюды, мне тут прыемна гуляць. Выдатныя эмоцыі. Хачу павіншаваць Анет, ты гуляла добра, але даруй... Дзякуй майму трэнеру (яму ўсё яшчэ скажу потым). Прывітанне маёй сям'і. Яшчэ раз дзякуй усім арганізатарам. Гэта быў фантастычны тыдзень".
Тытул ва Ухане для Сабаленкі стаў другім не толькі ў гэтым сезоне, але і ў кар'еры. Гэтая перамога прынесла Арыне 500 тысяч долараў прызавых - палова ад заробленага раней за сезон.
Пасля перамогі Арына пераедзе ў Пекін, дзе як паўфіналістка ва Ухане стартуе адразу з другога раўнда. Яе будучая суперніца - пераможца супрацьстаяння Гарбінье Мугуруса - Кацярына Макарава. У панядзелак у абноўленым рэйтынгу ВТА Сабаленка паднімецца на рэкордную для сябе 17-ю пазіцыю, зрушыўшы з гэтага радка Серэну Уільямс. У чэмпіёнскай гонцы, якая вызначае ўдзельніц выніковага турніру года, Арына ідзе 12-й. Дарога ў Сінгапур усё яшчэ адкрытая.
