Арына Сабаленка ў бліскучым стылі працягвае пераможнае шэсце па турніры катэгорыі Прэм'ер у англійскім Істбурне. Сёння ў 1/2 фіналу юная беларуска справілася са звышвопытнай тэнісісткай з Польшчы Агнешкай Радваньскай, 6-3, 1-6, 6-3. Матч працягваўся 1 гадзіну і 57 хвілін. Дарэчы, прызавы фонд спаборніцтваў - 852 тысячы долараў. Выхад у фінал Прэм'ера для беларускі стаў першым у кар'еры. У анлайн-рэйтынгу WTA Арына Сабаленка прама зараз займае 32 месца, але афіцыйна на гэты радок Арына паднімецца ў панядзелак, пасля таго як ён будзе абноўлены.
Арына Сабаленка, 45-я ракетка свету: "Пасля пераможнага першага сэта я страціла кантроль над ходам паядынку. Вельмі няпроста гуляць пастаянна трохсэтавыя матчы, добра, што ўсё завяршылася так. Радваньска ўмее чытаць гульню і накіроўваць мячы ў патрэбным кірунку. Я вельмі рада, што змагла абгуляць яе. У пачатку паядынку было прасцей зрабіць брэйк, чым утрымаць сваю падачу. Магчыма, я занадта нервавалася, паколькі ўпершыню ў кар'еры дабралася да паўфіналу на такім турніры. Важна аднавіцца да заўтрашняга фіналу. Мне падабаецца гуляць на вялікіх цэнтральных кортах, эмоцыі зашкальваюць".
Да гэтага ў фінале турніру ў Істбурне гулялі толькі дзве беларускі. У 99-м тут перамагла Наталля Зверава, у 2010-м Вікторыя Азаранка ў фінале саступіла. Заўтра хварэем за Арыну Сабаленку ў 14:30. Яе саперніцай стане Каралін Вазняцкі. Прамую трансляцыю тытульнага матча будзе весці тэлеканал "Беларусь 5".
