На гэтым панядзелак не апусціў планку. Усе, у каго яшчэ засталіся эмоцыі, са слязамі на вачах сачылі за скачкамі нашых лыжных акрабатаў. І тут яшчэ адна ўзрушаючая перамога. Антон Кушнір - алімпійскі чэмпіён у фрыстайле!
З гэтым бліскучым вынікам цёплымі словамі яго павіншаваў Кіраўнік дзяржавы. Дарагі Антон! Сёння табой упісана новая старонка ў гісторыю сусветнага спорту. Да гэтага поспеху ты прыйшоў праз гады знясільваючых трэніровак і выпрабаванні, якія выпалі на тваю долю. Уся краіна з заміраннем сэрца хваляваліся за цябе, і ты падарыў нам свята. Алімпійскія гульні ў Сочы запомняцца сапраўдным трыумфам беларускай школы фрыстайла! Дзякуй за гэта ўсяму калектыву нацыянальнай каманды! Жадаю моцнага здароўя і далейшых поспехаў - гаворыцца ў віншаванні.
А мы зноў нагадваем, як гэта было. У вячэрнюю фінальную частку спаборніцтваў наш спартсмен прабіўся толькі з другой спробы. У першым з трох фіналаў неаднаразовы пераможца этапаў Кубка свету набраў другую суму балаў, уступіўшы толькі галоўнаму фаварыту турніру Гуан Пуцы. Другі фінал. Кушнір - у чацвёрцы фаварытаў. І, нарэшце, вырашальная спроба ў супер-фінале. Найскладанейшы скачок - трайное сальта з пяццю вінтамі - Антон выконвае бездакорна. Рэкордная сума балаў - 134, 5. І вышэйшая ступенька п'едэстала.
