Члена нацыянальнай зборнай павіншаваў Прэзідэнт Беларусі Аляксандр Лукашэнка. "Віншую з бліскучай перамогай на чэмпіянаце свету па фрыстайле. Ты настойліва і ўпарта ішла да гэтага выніку, а цудоўны фінальны скачок у амерыканскім Дыр-Вэлі не пакінуў ніякіх сумненняў: ты - лепшая! Гэтая перамога чарговы раз пацвярджае, што ў Беларусі створаная школа лыжнай акрабатыкі сусветнага ўзроўню, якая ўжо не адно дзесяцігоддзе забяспечвае падрыхтоўку таленавітай моладзі. Шчыра жадаю табе, усёй камандзе і трэнерскаму складу моцнага здароўя і новых дасягненняў!" - гаворыцца ў віншаванні.
Для 22-гадовай беларускі гэтая перамога - галоўнае дасягненне ў дарослай кар'еры. Раней Аляксандра Раманоўская двойчы станавілася лепшай у свеце сярод юніёраў. А год таму на Алімпіядзе заняла 14-е месца. Сёння ж наша Аляксандра абышла расіянку Любоў Нікіціну і сярэбранага прызёра Алімпіяды ў Сочы Ксю Ментаа. Гэтую перамогу беларуска прысвячае бацьку, у якога сёння дзень нараджэння.
Аляксандра Раманоўская, чэмпіёнка свету па фрыстайле 2019 у лыжнай акрабатыцы: "Дзякуй вялізны ўсім балельшчыкам, усім, хто нас падтрымліваў, хто хваляваўся, мы змаглі, мы гэта зрабілі. Беларусь, прывітанне!"
Мікалай Казека, галоўны трэнер зборнай Беларусі па фрыстайле: "Вядома, эмоцыі зараз перахапляюць. Вельмі рады за Сашу, наогул каманда наша тут спрацавала нармальна. Усе імкнуліся, усе вельмі былі бойка настроеныя, але заўтра яшчэ камандныя спаборніцтвы. Будзем настройвацца на заўтрашні дзень. Так што дзякуй усім балельшчыкам, мы вельмі рады, дзякуй. Саша Раманоўская - малайчына!"
Мы віншуем Аляксандру і яе трэнера. Ну, а ў мужчынскіх спаборніцтвах Беларусь прадстаўляў алімпійскі чэмпіён Сочы Антон Кушнір. Але ён не змог патрапіць у шасцёрку лепшых фрыстайлістаў, каб выступіць у галоўным фінале. За Антонам выніковае 8-е месца. Наступнай ноччу на планетарным форуме ў Дыр-Вэлі пройдуць камандныя спаборніцтвы.
