Самалёт Кіраўніка дзяржавы вылецеў з міжнароднага аэрапорта імя Іслама Карымава. У аэрапорт беларускі лідар прыбыў з рэзідэнцыі Прэзідэнта Узбекістана "Кайнарсай". А ўчора Аляксандр Лукашэнка і Шаўкат Мірзіёеў гаварылі пра пашырэнне гандлю і кааперацыі.
Патэнцыял тавараабароту паміж краінамі ацэньваецца ў мільярд долараў. Цяперашні візіт Кіраўніка дзяржавы ўжо сёння на першых палосах газет. І гэта новы пункт адліку ў адносінах Беларусі і Узбекістана. Аляксандр Лукашэнка падкрэсліў, што не ўзгадае такой колькасці пэўных дакументаў і пагадненняў, якія падпісваліся на самым высокім узроўні з якой-небудзь краінай. Удзельнікі перамоў асабліва адзначаюць цёплую і дружалюбную атмасферу перамоў.
Уладзімір Макей, Міністр замежных спраў Беларусі: "Ведаеце, я ўпершыню сустракаю, каб падыход да СМІ адбываўся, вось як ён сёння адбыўся. Былі вось нейкія чалавечыя зносіны і кіраўнікоў нашых дзяржаў паміж сабою, і чалавечыя зносіны і з членамі дэлегацый, і з прэсай, са СМІ. Гэта гаворыць пра тое, што, сапраўды, атмасфера перамоў, атмасфера сустрэч, атмасфера ўсіх абмеркаванняў была вельмі цёплай, шчырай і адкрытай".
Сёння перамовы двух лідараў працягнуліся ў нефармальных абставінах. Шаўкат Мірзіёеў запрасіў Аляксандра Лукашэнку ў госці ў сваю загарадную рэзідэнцыю ў знак асаблівай павагі і сяброўства. Паміж прэзідэнтамі сапраўды склаліся вельмі цёплыя асабістыя адносіны. У нефармальнай атмасферы на свежым паветры, а пасля і за рабочым сняданкам кіраўнікі дзяржаў размаўлялі больш як тры гадзіны. Адзначым, што Аляксандр Лукашэнка першым з замежных лідараў наведаў загарадную асабістую рэзідэнцыю Прэзідэнта Узбекістана. Паводле інфармацыі журналістаў, раней Шаўкат Мірзіёеў не запрашаў у "Кайнарсай" кіраўнікоў дзяржаў.
Тым часам у Ташкенце працягваецца маштабная выстава Made in Belarus. Учора кіраўнікі дзяржаў далі старт гэтай гандлёвай і перагаворнай пляцоўцы. Вынікі яе працы яшчэ трэба будзе падлічыць, але яна ўжо выклікала небывалую цікавасць.
У выставе Made in Belarus удзельнічаюць больш за 150 буйных айчынных кампаній. Жыхары і госці Ташкента на працягу тыдня змогуць пакаштаваць, паглядзець і купіць беларускае. Учора ўдзельнікі форуму дзелавога і міжрэгіянальнага супрацоўніцтва падпісалі 82 кантракты на агульную суму каля 200 мільёнаў долараў.
