Праз некалькі гадзін Беларусь сустрэне Стары Новы год. Гэта адна з традыцый нашай суверэннай дзяржавы. Зрэшты, каранямі яна ідзе далёка ў мінулае. Цеплыня калядных дзён збірае за адным сталом родных і блізкіх, напаўняючы кожнага дабром, імкненнем да лепшага.
Вось і сёння на афіцыйны прыём ад імя Кіраўніка беларускай дзяржавы сабраліся лепшыя з лепшых: прадстаўнікі розных прафесій, значныя дзяржаўныя і грамадскія дзеячы, спартсмены, журналісты, дзеячы культуры. Гэты вечар заўсёды праходзіць у сяброўскай атмасферы. Тут ствараюць планы на наступны год і ўспамінаюць мінулы. Аляксандр Лукашэнка адзначыў, што 2016 не быў простым, але быў шматгранным.
Перад Старым Новым годам Кіраўнік дзяржавы ўручыў дзяржузнагароды і падзякі за шматгадовую плённую працу, прафесіяналізм і дасягненне высокіх вынікаў. Медалём "За працоўныя заслугі" адзначаная Алена Богдан - начальнік упраўлення Міністэрства аховы здароўя. Вользе Мазуронак - спартсмену-інструктару нацыянальнай каманды па лёгкай атлетыцы - прысвоена званне заслужанага майстра спорту. Медаль Францыска Скарыны Прэзідэнт уручыў Надзеі Філіпавай - артыстцы Вялікага тэатра оперы і балета. Сярод узнагароджаных і вялікая група нашых калег-журналістаў.
За плённую працу і высокі прафесіяналізм падзяка Прэзідэнта аб’яўлена намесніку Старшыні Белтэлерадыёкампаніі Марату Маркаву, а таксама намеснікам дырэктара Агенцтва тэленавін Сяргею Гусачэнку і яго калегу, тэлевядучаму ток-шоу "Форум" Дзмітрыю Бачкову, палітычнаму аглядальніку АТН Юрыю Пракопаву і намесніку генеральнага прадзюсара Вользе Шлягер. Віншуем калег!
