Пра выбух у метро Санкт-Пецярбурга прэзідэнты Беларусі і Расіі даведаліся падчас сустрэчы, якая сёння праходзіла за 20 кіламетраў ад Паўночнай сталіцы ў Палацы кангрэсаў у Стрэльні.
Першапачаткова размова сам-насам была прымеркавана да Дня яднання нашых народаў, аднак трагедыя ў метро ўнесла сур'ёзныя карэктывы ў дыялог лідараў. Як заявіў Аляксандр Лукашэнка, усе інтэграцыйныя праблемы і нявырашаныя пытанні ў эканоміцы гаснуць на фоне пагроз бяспекі. Менавіта абарона саюзнай айчыны становіцца галоўнай задачай улады як у Расіі, так і ў Беларусі. Спакойна нам жыць ніхто не дасць, падкрэсліў беларускі лідар, выказаўшы глыбокія спачуванні свайму калегу, родным і блізкім загінуўшых, усім пецярбуржцам.
Як заявіў Уладзімір Пуцін, ён ужо паспеў пагаварыць з дырэктарам ФСБ. Расследаваннем прычын трагедыі, дапамогай пацярпелым і сем'ям загінуўшых зоймуцца ўсе ведамствы - ад гарадскіх улад да федэральнага ўзроўню.
Вяртаючыся да двухбаковага парадку дня, Уладзімір Пуцін адзначыў, што сёлета краіны адзначаюць чвэрць стагоддзя ўсталявання дыпадносін. Ёсць магчымасць ацаніць маштаб зробленага за гэтыя гады як у разрэзе эканомікі, палітыкі, так і ў інтэграцыйным разрэзе. Прэзідэнт Расіі прызнаў, што ў саюзнікаў ёсць некаторыя праблемы. Аднак на агульную думку лідараў, усе яны вырашальныя. Галоўнае сёння - бяспека людзей, а эканамічныя рознагалоссі павінны вырашацца ў спакойным становішчы, падкрэсліў Аляксандр Лукашэнка. Вынікі сустрэчы прэзідэнтаў Беларусі і Расіі глядзіце ў эфіры "Панарамы".
