Беларусь заўсёды была для Турцыі надзейным сябрам і партнёрам. Прыхільнасць гэтаму курсу ў эканоміцы, гандлі і ваенна-тэхнічным супрацоўніцтве сёння выказаў Аляксандр Лукашэнка.
У Палацы Незалежнасці адбылася сустрэча Прэзідэнта з міністрам нацыянальнай абароны Турэцкай Рэспублікі. Кіраўнік дзяржавы адзначыў, што ў Беларусі вельмі ўважліва назіраюць за дзеяннямі Узброеных сіл Турцыі. А таксама высока ацаніў эфектыўнасць і планавасць дзеянняў турэцкай арміі. Дарэчы, ваенна-тэхнічнае супрацоўніцтва паміж краінамі пастаянна развіваецца. Зараз прапрацоўваецца шэраг перспектыўных праектаў. Адзін з іх тычыцца беларускіх спадарожнікавых тэхналогій. Сталічны завод "Пеленг" ужо накіраваў у Турцыю прапановы па стварэнні апаратуры для касмічных апаратаў дыстанцыйнага зандзіравання Зямлі. Яшчэ адзін перспектыўны кірунак - пастаўка сродкаў супрацьпаветранай абароны.
Хулусі Акар, Міністр нацыянальнай абароны Турцыі: "Выказваю ўдзячнасць за тыя добрыя словы, якія былі сказаны ў адрас маёй краіны. Я ўдзячны за тое, што Вы прымаеце нас, нягледзячы на Вашу шчыльную праграму. Мы хацелі прыбыць яшчэ ўчора, але ўмовы надвор’я прымусілі нас знаходзіцца ў рэжыме чакання. Толькі сёння нам удалося прыехаць. Хачу перадаць Вам цёплыя словы ад прэзідэнта Турцыі і запрашэнне ажыццявіць афіцыйны візіт у нашу краіну. Чакаем Вас у найбліжэйшы час".
Беларусь і Турцыя падтрымліваюць цесны кантакт на самых розных узроўнях, у тым ліку вышэйшым. Аляксандр Лукашэнка быў у Турцыі чатыры разы ў рамках працы на буйных самітах. А ў лістападзе 2016 адбыўся афіцыйны візіт прэзідэнта Турцыі ў Беларусь. Узаемны тавараабарот апошнія гады стабільна ля адзнакі ў мільярд долараў ЗША. У нашай краіне працуе больш за 300 прадпрыемстваў з удзелам турэцкага капіталу. Гэтая краіна нараўне з Азербайджанам - адзін з ключавых партнёраў Беларусі ў Азіяцкім рэгіёне.
