V Форум рэгіёнаў Беларусі і Расіі, безумоўна, цэнтральная тэма гэтага тыдня і падзея года для Саюзнай дзяржавы! Да гэтага маштабнага саміта абедзве краіны дбайна рыхтаваліся, і не толькі з арганізацыйнага пункта погляду (а ўсе госці адзначалі, як сардэчна прымаў Магілёў), але і ў плане рэалізацыі дамоўленасцяў пасля вераснёвых перамоў прэзідэнтаў у Сочы.
Дарэчы, цяперашняя сустрэча для Аляксандра Лукашэнкі і Уладзіміра Пуціна стала дзявятай з пачатку года, акрамя таго, лідары за гэты час яшчэ і сем разоў тэлефанавалі адзін аднаму! У частаце кантактаў ідуць на рэкорд! Зрэшты, каб Саюзная дзяржава працавала як гадзіннік, гэты самы гадзіннік трэба звяраць увесь час.
Мерапрыемствы Форуму рэгіёнаў расцягнуліся на некалькі дзён: кірмашы, секцыі па кірунках, савет дзелавога супрацоўніцтва і многае іншае. Кульмінацыяй стала пятнічнае пленарнае пасяджэнне, галоўнай тэмай якога было развіццё рэгіянальнага супрацоўніцтва. Але чырвонай ніткай усіх сустрэч стаў агульны дух адзінства беларусаў і расіян. І дзе, як не на магілёўскай зямлі, ля ўсходніх варот Беларусі, гаварыць пра гэтае яднанне?
Палітыка, эканоміка... У міждзяржаўных адносінах гэта, вядома, важныя сферы, але наўрад ці ў іх можна дамагчыся поспеху без адносін партнёрскіх і сяброўскіх. Менавіта такія ўжо даўно склаліся паміж Аляксандрам Лукашэнкам і Уладзімірам Пуціным. Пацвярджаюць гэта кадры, знятыя якраз на радзіме нашага Прэзідэнта - у Александрыі. Там, у родных месцах, дзе прайшло юнацтва, і ў доме, з якім звязаныя самыя цёплыя ўспаміны, прымаюць толькі самых блізкіх сяброў.
Стаўленне беларускага лідара да роднай зямлі ўсім вядома. Тут дом, у якім прайшло дзяцінства, школа, дзе не толькі вучыўся, але і пазней выкладаў, тут палі гаспадаркі, якой кіраваў. Зрэшты, у добрага гаспадара ва ўсім прыкметны парадак. Дагледжаныя раллі, добраўпарадкаваныя вуліцы, па якіх Аляксандр Лукашэнка правёз Уладзіміра Пуціна на рарытэтным ГАЗ-69, адноўленая крыніца, якую заснаваў дзядуля Прэзідэнта Трафім. Гэтай вясной Аляксандр Лукашэнка і сам прымаў удзел у суботніку, пасля зімы наводзілі парадак на роднай зямлі. Дарэчы, Трафімава крыніца - месца папулярнае і ў расійскіх турыстаў дзякуючы гаючым уласцівасцям вады, якой Аляксандр Лукашэнка пачаставаў Уладзіміра Пуціна.
Ну і, вядома, не абышлося без пачастунка традыцыйнай беларускай кухняй. Расійскі лідар у гасцях у Прэзідэнта Беларусі пакаштаваў і бліны, і дранікі проста з печы! Увогуле, абед прайшоў у спрадвечна беларускім стылі!
