Афіцыйны візіт грузінскага лідара ў Беларусь. Сёння ў Палацы Незалежнасці пройдуць перамовы Аляксандра Лукашэнкі і Георгія Маргвелашвілі ў вузкім і пашыраным фарматах. Намеры ў бакоў больш чым сур'ёзныя. На парадку дня - абмеркаванне двухбаковага супрацоўніцтва, асаблівую ўвагу нададуць актывізацыі гандлёва-эканамічных адносін. Наша здымачная група зараз працуе ў Палацы Незалежнасці.
Аб праграме візіту даведаемся ў Сяргея Хамянтоўскага (прамое ўключэнне). Нягледзячы на тое, што асноўныя перамовы пачнуцца толькі праз гадзіну, для сустрэчы высокага госця ўсё гатова. Ля Палаца Незалежнасці картэж Георгія Маргвелашвілі з'явіцца ў 10 раніцы. У атрыюме Палаца Незалежнасці свайго грузінскага калегу асабіста сустрэне Аляксандр Лукашэнка і пачнецца афіцыйная цырымонія з усімі належнымі такому выпадку атрыбутамі: ротай ганаровай варты, чырвонай дарожкай і гімнамі дзвюх краін.
Мінск сустракае грузінскага госця сапраўдным вясновым надвор'ем. У сталіцы абяцаюць +12. У сталіцы Грузіі сонечна і +15. Так і ў двухбаковых кантактах Беларусі і Грузіі няма ніякай прахалоды. Прыезд Георгія Маргвелашвілі ўжо назвалі гістарычным. І таму ёсць прычыны. Гэта першы афіцыйны візіт Прэзідэнта Грузіі ў Беларусь. Праграма вельмі насычаная. Кіраўнікі дзяржаў правядуць перамовы як у фармаце адзін на адзін, так і ў пашыраным складзе. У прыярытэце: гандлёва-эканамічнае супрацоўніцтва. Беларусь і Грузія маюць намер рабіць стаўку на вытворчую кааперацыю. У перспектыве - арганізацыя двух сумесных прадпрыемстваў па зборцы трактароў і ліфтаў. Тавараабарот паміж краінамі за апошні год вырас на 60% і наблізіўся да ста мільёнаў долараў. У 2015-м лідары Беларусі і Грузіі дамовіліся давесці двухбаковы тавараабарот да 200 мільёнаў долараў. Беларускі экспарт ужо разнастаілі 125 новых пазіцый.
Сёння па выніках перамоў чакаецца падпісанне шэрагу двухбаковых дакументаў. Акрамя таго, у праграме афіцыйнага візіту Прэзідэнта Грузіі - сустрэчы ва ўрадзе і парламенце. Плануецца, што Георгій Маргвелашвілі сустрэнецца з выкладчыкамі і студэнтамі БНТУ. А таксама наведае Музей гісторыі Вялікай Айчыннай вайны і мемарыяльны комплекс "Курган Славы".
Словам, гістарычны характар трохдзённага візіту Прэзідэнта Грузіі ў Беларусь - гэта зусім не перабольшанне. Аб гэтым шмат гавораць у кулуарах перамоў. Нягледзячы на шматвектарнасць інтэграцый Мінска і Тбілісі, ад супрацоўніцтва краіны могуць атрымаць немалыя эканамічныя бонусы. Тавараабарот 200 мільёнаў долараў і ўвогуле лічыцца рэальнай планкай. Чакаем пачатку афіцыйных перамоў.
