Беларусь накіруе ў Таджыкістан кіраўніцтва найбуйнейшых кампаній для вывучэння магчымасцяў стварэння новых сумесных вытворчасцяў. Такія заявы сёння прагучалі ў Палацы Незалежнасці, дзе прайшлі перамовы Аляксандра Лукашэнкі і Эмамалі Рахмона. Прэзідэнт Таджыкістана ў нашай краіне з рабочым візітам. Сустрэчы лідараў у вузкім складзе папярэднічала цырымонія фатаграфавання. Пасля чаго кіраўнікі дзяржаў пачалі абмеркаванне пытанняў двухбаковага парадку дня. Асноўная тэма - шляхі актывізацыі гандлёва-эканамічнага супрацоўніцтва і павелічэнне аб'ёмаў узаемнага гандлю. У планах - стварэнне новых сумесных прадпрыемстваў з магчымасцю выхаду на рынкі трэціх краін, напрыклад, Афганістана.
Сёння лідары дамовіліся і аб правядзенні маштабнай выставы беларускай прадукцыі ў Таджыкістане. Бізнес-форум пройдзе ўвесну наступнага года. Таксама Аляксандр Лукашэнка даручыў распрацаваць варыянты дастаўкі беларускай тэхнікі на выставу ў Душанбэ з магчымасцю яе продажу.
Беларусь і Таджыкістан маюць намер выпрацаваць новую дарожную карту ўзаемадзеяння. А па выніках сённяшніх перамоў у прысутнасці лідараў быў падпісаны пакет двухбаковых дакументаў. Сярод іх - пагадненні аб супрацоўніцтве ў сферах навукі і сельскай гаспадаркі. Акрамя таго Гомельскі і Магілёўскі раёны ўмацуюць сувязі з Хатлонскай і Сагдыйскай абласцямі Таджыкістана.
