У Палацы Незалежнасці прайшоў кадравы дзень

20 Жніўня 2019

Аляксандр Лукашэнка прызначыў Андрэя Кунцэвіча намеснікам кіраўніка Адміністрацыі Прэзідэнта. Раней ён на пазіцыі намесніка курыраваў пытанні ідэалогіі і сацыякультурнай сферы ў Магілёўскім аблвыканкаме. Зараз будзе адказваць за ідэалогію, працу грамадскіх аб'яднанняў і СМІ ў маштабе ўсёй краіны. Пры прызначэнні Кіраўнік дзяржавы гаварыў пра неабходнасць працаваць з моладдзю: ідзе сур’ёзная барацьба за маладыя розумы. У тым ліку і ў глабальнай сетцы. Частка даручэнняў датычылася і будучых парламенцкіх выбараў. Адміністрацыі Прэзідэнта даручана, не ўмешваючыся ў працу Цэнтрвыбаркама, забяспечыць ідэалогію гэтай кампаніі.

Абнавіўся і пул кіраўнікоў некаторых райвыканкамаў у Магілёўскай вобласці. У іх зоне ўвагі павінны быць усе пытанні - ад сельскай гаспадаркі да адраджэння прамысловых аб'ектаў. Плюс правільная праца з людзьмі.

Па выніках кадравага панядзелка ў Магілёўскі рэгіён вяртаецца Валерый Малашка, які перш займаў пасаду кіраўніка Міністэрства аховы здароўя. Кіраўнік дзяржавы ўзгадніў яго прызначэнне намеснікам старшыні Магілёўскага аблвыканкама. Кадравая ратацыя закранула Міністэрства антыманапольнага рэгулявання і гандлю. Там змяненні на ўзроўні намеснікаў кіраўніка ведамства.