Беларускія праваахоўнікі павінны гарантаваць бяспеку грамадзян і гасцей падчас II Еўрапейскіх гульняў, але без празмернасцяў. Наконт гэтага сёння гаварылі ў Палацы Незалежнасці Прэзідэнт і міністр унутраных спраў. Ігар Шуневіч, выступаючы з дакладам, адзначыў, што крымінагенны ўзровень у краіне нізкі, і Беларусь уваходзіць у лік самых бяспечных дзяржаў Еўропы. Аднак найбліжэйшы маштабны спартыўны форум - сур'ёзнае выпрабаванне для вартавых парадку.
Каб палепшыць эфектыўнасць працы, ведамства за апошнія паўгода прыняло шэраг кіраўніцкіх і кадравых рашэнняў. Так, па-ранейшаму самая актыўная ўвага нададзена напрамку па барацьбе з кіберзлачынствамі. Іх колькасць з кожным годам расце, і МУС робіць усё магчымае, каб быць на вастрыі інфармацыйнай бяспекі. А ўжо падчас размовы з прэсай Ігар Шуневіч расказаў, што таксама звярнуўся да Прэзідэнта з рапартам аб адстаўцы.
Адзначым, што Ігар Шуневіч займаў пасаду міністра ўнутраных спраў з 2012 года. Зрэшты, ён па-ранейшаму ўваходзіць у наглядальны савет хакейнага клуба "Дынама", перад якім таксама стаяць сур'ёзныя задачы, адна з якіх - выхаванне маладых хакеістаў і скарачэнне легіянераў. За найбліжэйшыя гады ўпор зробяць менавіта на развіцці сваіх талентаў.
