Сіла і моц беларускай арміі і гатоўнасць у любую хвіліну абараніць суверэнітэт і незалежнасць. Па традыцыі ў галоўнае дзяржаўнае свята - Дзень Незалежнасці - сталіца Беларусі і мільёны тэлегледачоў пачулі фанфары маштабнага парада. Сёння многае было ўпершыню. Гэта тычыцца ўдзелу ў ім пешых разлікаў і найноўшай ваеннай тэхнікі і ўзбраення. Плячо да пляча разам парадным маршам прайшлі вайскоўцы Беларусі, Расіі і нашых партнёраў - Кітая. У парадзе больш за 4 тысячы вайскоўцаў і 250 адзінак баявой тэхнікі, 19 пешых і 23 механізаваныя разлікі. Упершыню ў парадным страі жанчыны-вайскоўцы. Аддаючы даніну памяці падзеям Другой сусветнай вайны, беларуская дзяржава памятае, што пачалася яна на Захадзе, а завяршылася на Усходзе. Самыя яркія кадры парада - у нашым рэпартажы.
Менавіта сюды скіраваныя сёння пачуцці і погляды беларусаў. Тысячы гледачоў, як рэкі да аднаго сэрца, сцякаліся з самой раніцы да стэлы "Мінск - горад-герой". Святочныя мерапрыемствы ў Дзень Незалежнасці традыцыйна стартуюць на праспекце Пераможцаў. Выезд на плошчу картэжа Прэзідэнта Аляксандра Лукашэнкі дае старт урачыстым мерапрыемствам.
На праспект выязджаюць дзве адкрытыя парадныя машыны. Пачынаецца традыцыйны аб'езд войскаў.
Нацыя, якая ўступіла ў смяротную сутычку з ворагам за родную зямлю, непераможная, падкрэслівае беларускі лідар ва ўрачыстай прамове. Мінск вызвалены 74 гады таму. У барацьбе з бязлітасным агрэсарам нашы суайчыннікі прадэманстравалі нязломную волю, цвёрдасць і сілу духу. Беларусы не пакарыліся фашысцкім акупантам і разам з іншымі братэрскімі народамі перамаглі ў самай страшнай і крывавай вайне XX стагоддзя. На жаль, і сёння на планеце неспакойна.
Аляксандр Лукашэнка павіншаваў усіх з Днём Незалежнасці. З асаблівай павагай звярнуўся да ветэранаў, якія ў свой час абаранілі для нас права жыць на роднай зямлі.
Пешы парад традыцыйна адкрываюць самыя юныя ўдзельнікі - барабаншчыкі Мінскага сувораўскага ваеннага вучылішча.
Перад мільёнамі гледачоў 19 пешых парадных і 23 парадныя разлікі ваеннай тэхнікі. Такое ганаровае права яны заслужылі сваёй ратнай працай і поспехамі ў выкананні вучэбна-баявых задач.
Парад гэтага года ўнікальны. Бо ў 2018 нашы Узброеныя Сілы святкуюць векавы юбілей. Пры гэтым стагоддзе бездакорнай службы на самым перадавым баявым пасту адзначаюць пагранічнікі. Таксама роўна стагоддзе мінуў з дня заснавання ўнутраных войскаў МУС Рэспублікі Беларусь. І ўсе гэтыя гады краіна па праве ганарыцца сваёй арміяй. Упершыню разам з беларускімі вайскоўцамі побач на парадзе вайскоўцы не толькі Расійскай Федэрацыі, але і Кітая.
Самае відовішчнае - дэманстрацыя ваеннай тэхнікі. Перад гледачамі - больш за 250 баявых наземных машын: бронетранспарцёры, высокаманеўраныя недарожнікі, сучасныя танкі. Першы ў параднай калоне легендарны Т-34 - лепшы ў гады вайны. За ім Т-72Б, які лічыцца перадавым у сучасным свеце. Беларускі ваенпрам працуе над яго мадэрнізацыяй.
Беларусі ёсць што паказаць. Упершыню ў парадным страі калона бронетранспарцёраў БТР-70МБ1. Яны ўжо прайшлі мадэрнізацыю на прадпрыемствах беларускай абаронкі.
Перад трыбунай "Волаты" і "Драконы". Прыклад паспяховага партнёрства Беларусі і Кітая. Упершыню перад шырокай публікай беларускі "Шэршань" на платформе айчыннага "Волата". Гэта найноўшая распрацоўка, якая пацвердзіла высокі ўзровень ваенпрама краіны ў сегменце супрацьтанкавых ракетных комплексаў.
Беспілотнікі, дроны, бамбардзіроўшчыкі. Упершыню на парадзе супрацьтанкавы робат "Багамол". Сёння распрацоўкамі і вытворчасцю такіх сістэм займаюцца толькі некалькі высокатэхналагічных дзяржаў, сярод якіх і Беларусь.
"Гіяцынт", "Гваздзік", яшчэ больш грозная зброя - "Штурм", "Бялград", "Смерч", "Кропка", "Аса". Па-за канкурэнцыяй па авацыях і рэактыўная сістэма залпавага агню "Паланэз". Яна здольная нанесці кропкавы ўдар адразу па васьмі цэлях на адлегласці да 200 кіламетраў. Вышэйшы пілатаж прадэманстраваў у небе беларускі паветраны эшалон. У тэлегледачоў ёсць перавага. Камеры здымалі пілотаў унутры самалётаў. Гэта гонар Беларусі - нацыянальная пілатажная школа.
Майстэрству пілотаў не саступала і рота ганаровай варты - элітнае падраздзяленне. Пляц-канцэрт здзівіў гледачоў новымі высокатэхнічнымі фігурамі і зладжанымі рухамі 115 чалавек. Унікальная методыка падрыхтоўкі дазваляе дасягаць самага высокага ўзроўню майстэрства ў авалоданні найскладанейшымі страявымі прыёмамі.
Парад зноў падарыў гледачам незабыўныя эмоцыі. І стаў прыгожай дэманстрацыяй сілы і моцы беларускай арміі.
У выкананні зводнага аркестра гучыць новая песня Леаніда Брагінскага на словы Івана Цітаўца "На парадзе".
У завяршэнне парада 2 тысячы маладых людзей стварылі паказ "Мой родны кут". Эпізод сімвалізуе адзінства ўсіх рэгіёнаў Беларусі ад сталіцы да малых куткоў краіны.
