У Мінску ў Палацы Незалежнасці праходзяць перамовы прэзідэнтаў Беларусі і Судана

10 Снежня 2018

У гэтыя хвіліны ў Палацы Незалежнасці праходзяць афіцыйныя перамовы Прэзідэнта Беларусі і лідара Судана.

Амар Хасан Ахмед Аль-Башыр прыбыў у Мінск учора. Кантакты паміж дзвюма краінамі развіваюцца. У апошнія паўтара года ў адносінах адзначаецца асаблівы прагрэс. Гэтая дзяржава - важны партнёр Мінска на Афрыканскім кантыненце. Штуршком для развіцця дыялогу стаў візіт нашага Прэзідэнта ў Хартум узімку 2017.

Патэнцыял у дзвюх краін, якія знаходзяцца на стыку найважнейшых рэгіёнаў, - вялізны. Беларусь злучае Еўропу і Азію, уваходзіць у Еўразійскі саюз. Судан з'яўляецца мостам паміж арабскай цывілізацыяй і Афрыкай. Беларусь нарошчвае свой экспарт у гэтую афрыканскую краіну. У 2018 на суданскі рынак паставілі трактарную тэхніку, металапрадукцыю, рухавікі, помпы і кампрэсары, электраабсталяванне і іншую прадукцыю. Мінск і Хартум імкнуцца да больш шматпланавых эканамічных адносін, чым проста абмен таварамі.

Амар Хасан Ахмед Аль-Башыр, Прэзідэнт Судана: "Для мяне вялікае шчасце быць у Беларусі, дружалюбнай для нас краіне. Нашы адносіны ўмацоўваюцца, асабліва пасля Вашага візіту ў Хартум летась. Рэальны вынік Вашага візіту - адкрыццё пасольства Судана ў Беларусі. Мы вельмі здаволеныя ўзроўнем нашых адносін. Са мной прыбыла вялікая дэлегацыя, і мы ўпэўненыя, што разам з Беларуссю можам зрабіць многае".

Сярод перспектыўных кірункаў супрацоўніцтва Мінска і Хартума - удзел беларускіх кампаній у праектах у сферах золатаздабычы, энергетыкі і будаўніцтва, арганізацыя ў Судане сумесных зборачных вытворчасцяў аўтамабільнай і сельскагаспадарчай тэхнікі, стварэнне прадпрыемстваў па вытворчасці мясной і малочнай прадукцыі, прапанаванне беларускіх адукацыйных паслуг. У гэтыя дні ў Мінску адкрываецца пасольства Судана. Плануецца, што па выніках беларуска-суданскіх перамоў будзе падпісаны пакет дакументаў.

 


Папулярныя

Рэкамендуемыя