Так, у адносінах Беларусі і Латвіі надыходзіць новая эпоха, канстатавалі журналісты. У пятніцу Кіраўнік дзяржавы сустрэўся з міністрам замежных спраў гэтай краіны Эдгарсам Рынкевічсам. Апошні час палітычны дыялог ідзе ўверх - гэта дадатна адбіваецца і на ўзаемным гандлі. Летась лічба перавысіла паўмільярда долараў, але патэнцыял нашмат большы. Дарэчы, Кіраўніка беларускай дзяржавы чакаюць у Рызе з візітам. Дата пакуль не завецца, бо праграму павінны напоўніць пэўныя праекты, якія прынясуць краінам важкі вынік. Латвія зацікаўленая таксама ў нармалізацыі адносін Беларусі з Еўрасаюзам.
А вось пра тое, што Беларусь не бачыць перашкод для развіцця палітычнага дыялогу з Еўрасаюзам і гатовая працягваць рух у гэтым кірунку, Аляксандр Лукашэнка заявіў на сустрэчы з кіраўніком прадстаўніцтва ЕС у Беларусі. Андрэа Віктарын завяршае сваю 4-гадовую місію ў нашай краіне. У Палацы Незалежнасці падвялі вынікі яе працы і ацанілі, наколькі прасунуліся Беларусь і ЕС насустрач адно аднаму. Бакі навучыліся чуць партнёра, таму сумесная праца стала нашмат больш эфектыўнай. Пры гэтым застаецца і вялізны патэнцыял для нарошчвання ўзаемадзеяння: ад пытанняў вялікай палітыкі да асобных праектаў і спрашчэння візавага рэжыму.
