Уборачная кампанія, дзяржпадтрымка і развіцце рыбнай гаспадаркі. Прэзідэнт чакае аддачы ад Магілёўскай вобласці

Паўднёвы ўсход Магілёўскай вобласці перажывае гістарычнае перараджэнне: ад буйных вытворчых комплексаў  да сацыяльнага жылля, школ, бальніц і спартыўных аб'ектаў.

Новае дыханне  праграме развіцця самых пацярпелых ад Чарнобыля раёнаў Магілёўшчыны ў Касцюковічах  сёння гарантаваў Кіраўнік дзяржавы. Апошнія чатыры гады  гэтым рэгіёнам займаліся ўрад і мясцовая ўлада. Надалей жалезны кантроль за рэалізацыяй кожнага праекта  будзе зыходзіць з найвышэйшага ўзроўню. Гаворка ідзе пра будаўніцтва вялікіх жывёлагадоўчых комплексаў і буйнога рыбнага кластара - толькі каштоўныя і экзатычныя для Беларусі стронга і асятровыя. Плюс  праз раёны плануюць пусціць  другі еўразійскі транспартны калідор! Ён злучыць  Еўрасаюз, Расію і Казахстан, а паралельна палепшыць усю сетку мясцовых дарог. Таксама Прэзідэнт паабяцаў дапамогу з рэспубліканскага бюджэту ў будаўніцтве жылля для шматдзетных, каштоўных спецыялістаў і вялікіх аб'ектаў, якія паляпшаюць якасць жыцця.

Кіраўнік дзяржавы даручыў актуалізаваць праграму развіцця паўднёва-ўсходніх рэгіёнаў і прадставіць яму пэўныя прапановы ў самы кароткі тэрмін. Абновяць і нацыянальную праграму рыбагаспадарчай дзейнасці. Гэтае даручэнне ўзнікла сёння  падчас наведвання аднаго з участкаў холдынга "Лахва" па вытворчасці стронгі. На тэрыторыі знаходзіцца рыбагадавальнік. Тут штогод выгадоўваюць 700 тон таварнай стронгі. І ёсць рэзервы для павелічэння аб'ёмаў. Дзейнічае поўны ланцуг: маляўка - вытворчасць - перапрацоўка! І гэта цэлы год! Прадукцыя ў суадносінах 50 на 50  ідзе на ўнутраны рынак і экспартуецца ў Расію. Тут для рыб створаныя сапраўды санаторныя ўмовы: высокапратэінавы корм, унікальнай чысціні артэзіянская вада (за яе станам сочыць камп'ютар), а дэталёвая справаздача па СМС прыходзіць рыбаводу. Прэзідэнт пакаштаваў  стронгу гарачага і халоднага вэнджання, чырвоную ікру і адзначыў іх высокія смакавыя якасці. Абноўленыя прапановы па развіцці рыбгасдзейнасці ў краіне  павінны падаць Прэзідэнту ўжо сёлета.

Ведаючы, што Кіраўнік дзяржавы знаходзіцца ў рэгіёне, на галоўнай вуліцы Касцюковіч сабралася шмат людзей. Аляксандр Лукашэнка растлумачыў мэту свайго візіту, гаварылі пра ператварэнне гэтых земляў і тое, калі людзі адчуюць эфект гэтых перамен. Але гэта не павінна быць гульня ў адны вароты. Адказнасць за вынік, за будучыню свайго горада і раёна ляжыць на кожным з жыхароў. Дзяржава падтрымае, але толькі там, дзе гэта сапраўды неабходна. Хтосьці з людзей прасіў звярнуць увагу на рэгіён і дапамагчы, хтосьці дзякаваў за ўжо зробленае за апошнія гады, іншыя звярталіся з асабістымі просьбамі. Адна з жанчын нават падарыла Кіраўніку дзяржавы напісаныя ёю кнігі. А вось Аляксандр Лукашэнка па традыцыі пачаставаў прысутных сваім фірмовым шакаладам "Прэзідэнт".