Гэта заявіў Прэзідэнт Аляксандр Лукашэнка на сустрэчы са Старшынёй парламента Грузіі Іракліем Кабахідзэ.
Расказвае Ілона Красуцкая.
Асабліва апошнім часам СМІ стракацяць навінамі аб беларуска-грузінскім супрацоўніцтве. Дні культуры Беларусі, візіт урадавай дэлегацыі, дзіцячае "Еўрабачанне". На мінулым тыдні Кіраўнік дзяржавы сустрэўся з паслом Грузіі з нагоды завяршэння яго дыпмісіі. І вось сёння ў Палацы Незалежнасці зноў госці - парламенцкая дэлегацыя. Такая інтэнсіўнасць кантактаў заканамерная - на першую палову наступнага запланаваны візіт Прэзідэнта Беларусі ў Грузію.
Узначальвае парламент Грузіі малады спікер Іраклій Кабахідзэ. У гэтым статусе ўжо год. І гэта яго першы візіт у Беларусь. У парламентарыя юрыдычная адукацыя. Ён аўтар мноства кніг і навуковых артыкулаў па пытаннях канстытуцыйнага права. Восем гадоў кіраваў праектамі праграм развіцця ААН у Грузіі.
Увесь апошні тыдзень у беларуска-грузінскіх адносінах рабілі акцэнт на эканоміцы. Тавараабарот паміж краінамі за апошні год наблізіўся да сотні мільёнаў долараў. Беларускі экспарт разнастаілі 125 новых пазіцый. Намечаная планка прэзідэнтамі дзвюх краін у 200 мільёнаў цалкам рэальная. Дасягаць гэтай лічбы будуць за кошт наладжвання ўзаемавыгаднага супрацоўніцтва ў такіх сферах, як фармакалогія, цяжкая прамысловасць і АПК.
Даўняе сяброўства лідараў, супольнасць поглядаў і даверны дыялог. Усё гэта, без сумнення, прыносіць бонус узаемнаму гандлю.
Але ёсць і тое, што звязвае краіны куды мацней за шматмільённыя кантракты - гатоўнасць у любы момант прыйсці адна адной на дапамогу. У маі ўрад Грузіі прыняў рашэнне бясплатна перадаць Беларусі прэпарат для лячэння гепатыту С.
А ў жніўні, калі ў Грузіі здарылася бяда, наша краіна адрэагавала неадкладна. Верталёт Мі-26 МНС Беларусі вылецеў для ліквідацыі буйнога ляснога пажару. У знакамітай Баржомскай цясніне агонь ушчыльную наблізіўся да населеных пунктаў і пагражаў дамам і жыццям людзей. Дапамагаць змагацца са стыхіяй нашы ратавальнікі адправіліся па даручэнні Прэзідэнта Аляксандра Лукашэнкі.
Гэта зараз парламентарыі дзвюх краін у пастаянным кантакце, а яшчэ 5 гадоў таму міжпарламенцкія сувязі былі слабыя, не было і груп сяброўства, і абмену візітамі. Сёння ў Палацы Незалежнасці ўсё больш гаварылі аб палітыцы і ўзмацненні міжпарламенцкіх сувязяў.
У верасні Грузія абнавіла Канстытуцыю. Краіна перайшла да парламенцкай мадэлі кіравання. Відавочна, менавіта спікерам вярстаць і ўзгадняць праграму маючага адбыцца прэзідэнцкага візіту.
У ліпені ў Беларусі ўпершыню прайшла сесія Парламенцкай асамблеі АБСЕ. Папярэдні форум прымала Грузія. І нашы парламентарыі не раз бывалі ў Тбілісі - пераймалі вопыт арганізацыі. І відавочна паспяхова - Генеральны сакратар Раберта Мантэла назваў 26-ю летнюю сесію ў Мінску самай прадстаўнічай у гісторыі арганізацыі.
Нягледзячы на выхад Тбілісі з СНД, у беларуска-грузінскіх адносінах захаваны рэжым свабоднага гандлю. А з улікам цяперашніх прыярытэтаў знешняй палітыкі Грузіі - еўрапейскай і еўраатлантычнай інтэграцыі, можна гаварыць пра бартар інтарэсаў. Такім чынам для Грузіі Беларусь становіцца дзвярамі на рынак Еўразійскага эканамічнага саюза. Наўзамен эфект ад асацыяцыі Тбілісі з ЕС.
Іраклій Кабахідзэ, старшыня парламента Грузіі:
"Вялікі дзякуй за прыём. Нас звязваюць не толькі палітычныя адносіны, сяброўства паміж нашымі народамі. У нас ёсць адносіны. Для нас важныя цесныя палітычныя, эканамічныя адносіны. Ваш асабісты ўклад у гэта вялізны. У нас выдатныя адносіны і дынаміка вельмі інтэнсіўная. Далей мацаваць сяброўства паміж нашымі народамі".
На працягу трохдзённага візіту парламенцкую дэлегацыю будзе суправаджаць пасол Беларусі ў Грузіі Міхаіл Мятлікаў. Перамовы таксама адбудуцца ва ўрадзе, госці наведаюць прамысловыя і аграрныя прадпрыемствы.
У Каўказскім рэгіёне ўжо прадстаўлены гіганты нашага аўтапрама - БелАЗ, МТЗ, МАЗ. Белкамунмаш і "Штадлер-Мінск" зараз вядуць перамовы аб пастаўках пасажырскай тэхнікі для Грузіі. Зусім хутка ў Каўказскім рэгіёне пашырыцца сетка беларускіх магазінаў.
Якія яны на смак, навінкі мясных далікатэсаў і беларускіх прысмакаў, сёння першымі паспрабавалі жыхары і госці Тбілісі. Там адкрылася выстава AGRO FOOD DRINK TECH. Экспо - ключавое мерапрыемства харчовай індустрыі ў Грузіі і Каўказскім рэгіёне. Летась у выставе прынялі ўдзел больш за 120 кампаній з 15-ці краін свету. А гасцямі сталі больш як 5 тысяч чалавек. На гэты раз сваю прадукцыю ў калектыўнай экспазіцыі Made in Belarus прапануюць дзевяць айчынных кампаній. Сярод іх холдынг "Гомсельмаш" са сваімі збожжа- і кормаўборачнымі камбайнамі "Палессе".
Перспектывы двухбаковых адносін Мінска і Тбілісі сёння абмяркоўвалі і ў парламенце. Актывізаваць кантакты бакі маюць намер за кошт росту рэгіянальнага супрацоўніцтва, новых гуманітарных і эканамічных ініцыятыў. Гэта стварэнне сумесных бізнес-цэнтраў для актыўнага пасоўвання новых вытворчасцяў. Таксама Беларусь прапанавала Грузіі падключацца да маштабнага праекта па стварэнні Эканамічнага пояса Шаўковага шляху.
Аб узмацненні міжпарламенцкіх сувязяў спікер ніжняй палаты парламента Уладзімір Андрэйчанка гаварыў са сваім грузінскім калегам. У прыярытэце развіццё двухбаковых кантактаў і сумесная работа ў міжнародных структурах. Асаблівая роля ў гэтым адводзіцца групам сяброўства ў заканадаўчых органах дзвюх краін.
Дзіўная прырода, сытная кухня і цудоўнае віно… Урад Грузіі развівае чатырохсезонныя курорты. Штогод краіну гор наведваюць каля 6 мільёнаў замежных турыстаў. Сярод іх 40 тысяч беларусаў. Краіны падзяляюць 3 тысячы кіламетраў. Але, як паказвае практыка, адлегласць не стала перашкодай ні эканоміцы, ні дружалюбным кантактам. І самае галоўнае - нягледзячы на інтэграцыйныя перавагі, краіны верныя абранаму курсу. Ізноў адкрываюць новую старонку ў беларуска-грузінскіх адносінах.
