Спрабуе сябе наша краіна і ў новым для сябе амплуа - вытворцы легкавых аўтамабіляў. Прычым, найноўшага пакалення. Стварэнне і вытворчасць электрамабіляў Кіраўнік дзяржавы абмеркаваў падчас сустрэч са спецыялістамі Акадэміі навук і міністрам прамысловасці. Зусім нядаўна адбылася прэзентацыя доследнага ўзору айчыннага электракара. А сёння Прэзідэнт асабіста пратэсціраваў аўтамабіль Tesla і падзяліўся ўражаннямі аб апошняй мадэлі амерыканскага ўзору. Пра арыенціры для флагманаў беларускага машынабудавання Наталля Брэус.
Вось такі насычаны трафік - цалкам звычная карціна для двухмільённага Мінска. Толькі ў сталіцы на тысячу чалавек прыходзіцца больш як 400 аўтамабіляў, і з года ў год колькасць машын толькі расце. Жыццё змяняецца, але нават не з такой хуткасцю, як тут - усё значна імклівей. Новыя трэнды прыходзяць і ў аўтамабільны свет. Электрыфікацыя - самая абмеркаваная тэма!
Глабальны рынак электракараў актыўна развіваецца. Колькасць такіх машын у свеце расце рэкорднымі тэмпамі. Зараз налічваецца больш як 2 мільёны аўто, энергію акумулятараў якіх можна папаўняць з дапамогай разеткі. Пакуль гэта мізэр, калі ўлічваць увесь аўтапарк планеты. Але эксперты гавораць: яшчэ гадоў 7-10 і колькасць вырасце ў разы. Лідары ў гэтай сферы - ЗША і Кітай. КНР інвестуе прыстойныя сумы - пад 15 мільярдаў долараў у развіццё вытворчасцяў электрамабіляў. Запускаюць спецыяльныя праграмы, грамадскі транспарт пераходзіць на электрычнасць. У Нарвегіі на электракары прыпадае 28% ад усіх новых зарэгістраваных аўтамабіляў. Эксперты прагназуюць, што да 2030 года доля рынку электрамабіляў складзе 30%.
Будучыню аўтатранспарту Аляксандр Лукашэнка дальнабачна закранаў і раней. Гаварыў аб гэтым на Усебеларускім народным сходзе летась. Тэма становіцца толькі больш актуальнай. Адразу некалькі нацыянальных праектаў дадуць магчымасць быць Беларусі ў трэндзе. Аб гэтым размова сёння з кіраўніцтвам Акадэміі навук і Мінпрама.
"Тэслу" завуць лепшым электракарам у свеце. Вось яна - апошняя распрацоўка амерыканскай кампаніі. За 2 з паловай секунды гэтая машына разганяецца да хуткасці 100 кіламетраў за гадзіну. Сапраўдны суперкар яшчэ і таму, што мае адны з самых вялікіх паказчыкаў прабегу без падзарадкі ў свеце. Без разеткі праедзе як мінімум 500 кіламетраў. У Аляксандра Лукашэнкі была магчымасць пратэсціраваць аўтамабіль. Вынікі тэст-драйва ўразілі Кіраўніка дзяржавы.
Вядома, прамыслоўцы і навукоўцы з вялікай цікавасцю - і асабістай, і прафесійнай - глядзяць навінку. Увесь свет разумее, што электрычнасць - гэта вельмі выгадна. Гэта высокі ККД, паніжэнне выдаткаў на перавозку грузаў і пасажыраў, гэта памяншэнне шкодных выкідаў у атмасферу.
Доследны ўзор беларускага электрамабіля стварылі спецыялісты Акадэміі навук. Тыдзень таму распрацоўку прэзентавалі грамадскасці.
Вядома, да "тэслы" яшчэ далёка. Ды і клас розны. З нуля аўто будучыні атрымалася сабраць менш чым за год. Зараджаецца машына ад 4 да 6 гадзін. Хапае на паездку ў 150 кіламетраў. Разганяецца электрамабіль пакуль да ста кіламетраў за гадзіну. Замест звычнага тахометра - прыбор паказвае расход току.
Эксперыментальны ўзор зрабілі на базе "джылі" беларускай зборкі. Зараз аўто даводзяць да розуму. Рэгулююць усе параметры і думаюць, як лепш і дзе арганізаваць серыйную вытворчасць. Акадэмія навук працуе над новым тыпам накапляльніка электраэнергіі. Калі праект атрымаецца (а ён павінен атрымацца), то яго кошт значна панізіцца.
Шматлікія краіны ў пошуках альтэрнатывы нафце і газу робяць стаўку на электрычны транспарт. Краіне, якая не можа пахваліцца багатымі запасамі вуглевадародаў, сам бог загадаў. Апроч відавочнага, развіццё тэхналогій і адсутнасці такой шкоды для экалогіі эфекту - электратранспарт забярэ на сябе частку энергіі, атрыманай на АЭС. Станцыя будзе буйным вытворцам даступнай электрычнасці.
Гнацца за сусветнымі вытворцамі няпроста. Але выкарыстанне сваіх распрацовак дазволіць заняць сваю нішу на рынку. Да гэтага імкнуцца.
Апроч легкавога электрамабіля, у краіне сур'ёзна развіваецца кірунак электробусаў. Гарадскія тралейбусы, якім не патрэбна пастаянная падача току. Партыя такіх мадэляў ужо курсіруе па горадзе - актыўна рэкламуюць і замежным пакупнікам. Аб тым, што за гэты кірунак узяліся сур'ёзна, гаворыць і намер распрацаваць дзяржпраграму развіцця электрапрывадной тэхнікі з рознымі крыніцамі энергіі.
У Беларусі сёння больш як 3 мільёны транспартных сродкаў. У Мінпраме разумеюць, што калі прапанаваць рынку канкурэнтаздольны электрамабіль, зручную інфраструктуру, то тады і пакупнік прагаласуе за яго рублём. Тым больш што паездкі на электракарах па кошце ў 2-3 разы больш выгадныя, чым на бензінавых машынах. Эканоміць можна на тэхнічным абслугоўванні. Гучыць калі не фантастычна, то як мінімум нязвыкла, але і смартфоны напачатку здзіўлялі.
