Будаўніцтва басейна міжнароднага стандарту і Нацыянальнага футбольнага стадыёна магчыма пачаць ужо ў першай палове наступнага года. Напярэдадні Прэзідэнту далажылі аб рэалізацыі гэтых маштабных праектаў.
Яны абодва будуць размешчаныя ў Мінску і збудаваныя за кошт бязвыплатнай тэхніка-эканамічнай дапамогі Кітая. Пагадненне паміж урадамі дзвюх краін было падпісана ў кастрычніку 2018 года.
А ўжо праз паўгода Старшыня КНР Сі Цзіньпін прадэманстраваў беларускаму Прэзідэнту, як будуць выглядаць стадыён і басейн. На палях форуму "Пояс і шлях" у Пекіне тады адбылася сустрэча двух лідараў. Гэтыя праекты прадугледжваюць рэалізацыю самых сучасных архітэктурных рашэнняў.
Так, басейн будзе разлічаны на 6 тысяч гледачоў і будзе адпавядаць усім патрабаванням Міжнароднай федэрацыі плавання. Трыбуны новага футбольнага стадыёна змогуць змясціць 33 тысячы гледачоў. Узвядзенне аб'ектаў выконваецца пад ключ. Тэрмін рэалізацыі - 2023 год. Увогуле на будаўніцтва Кітай вылучыць 235 мільёнаў долараў.
У размове абмеркавалі падрыхтоўку пляцовак. Тут Аляксандр Лукашэнка звярнуў увагу, каб у месцы будаўніцтва не секлі лішнія дрэвы. Важна таксама і загадзя прадумаць нюансы эксплуатацыі ўжо гатовых будынкаў. Як і Беларусь, Кітай надае вялікую ўвагу развіццю спорту. Супрацоўніцтва па гэтым кірунку з КНР паспрыяе далейшаму правядзенню ў нашай краіне міжнародных топ-спаборніцтваў. Ну а для Пекіна гэтыя аб'екты ў Мінску стануць візітнай карткай Кітая ў Еўропе.
Будаўніцтва басейна і футбольнага стадыёна магчыма пачаць ужо ў першай палове 2020 года
7 августа 2019