Самалёт Кіраўніка дзяржавы некалькі гадзін таму вылецеў з Нацыянальнага аэрапорта Мінск. У Баку пройдуць перамовы беларускага лідара з прэзідэнтам Азербайджана Ільхамам Аліевым у фармаце сам-насам, а таксама ў пашыраным складзе. Па выніках сустрэч будзе падпісаны шэраг дакументаў аб двухбаковым супрацоўніцтве. Азербайджан з'яўляецца важным для Беларусі гандлёва-эканамічным партнёрам. За 6 гадоў тавараабарот паміж краінамі павялічыўся ў 6 разоў і па выніках мінулага года склаў больш за 200 мільёнаў долараў.
Чакаецца таксама, што Аляксандр Лукашэнка прыме ўдзел у адкрыцці новага будынка пасольства Беларусі ў Баку. Яно размешчана ў Хатаінскім раёне. На плошчы ў паўгектара пабудаваны трохпавярховы адміністрацыйны будынак у 1016 квадратных метраў, а таксама 6-павярховы жылы дом на 18 кватэр. У Азербайджане зараз паспяхова збіраюць камунальную тэхніку, аптычнае абсталяванне, ліфты, беларускія трактары і грузавыя аўтамабілі.
Значныя рэзервы для ўзаемавыгаднага супрацоўніцтва ёсць і ў такіх сферах, як турызм, адукацыя, медыцына і будаўніцтва.
