Ермухамет Ертысбаеў не толькі завяршае сваю місію ў нашай краіне, але і кар'еру дыпламата
За дзесяцігоддзі на дзяржслужбе Ертысбаеў тройчы быў саветнікам Прэзідэнта Казахстана, узначальваў Міністэрства інфармацыі і культуры. Як чалавек з такім вялізным вопытам, ён не збіраецца знікаць з радараў на палітычным полі. Гэтая выніковая сустрэча добрая падстава правесці рэвізію кантактаў і аб'ектыўна паглядзець на праробленую працу.
Для пасла два гады дыпслужбы ў Беларусі звязаны з добрай дынамікай узаемадзеяння
Тавараабарот імкнецца ўверх, па выніках мінулага года наблізіўся да 900 млн долараў. Але мэта - дасягнуць лічбы ў некалькі мільярдаў. У Казахстане вось ужо як 4 месяцы новы прэзідэнт. З Касым-Жамартам Такаевым Аляксандр Лукашэнка бачыўся ў канцы мая на юбілейным саміце ЕАЭС у Нурсултане, палітыкі правялі двухбаковую сустрэчу. Агульны тэзіс - не проста захаваць тэмп адносін, але і паскорыцца па шматлікіх кірунках. Грунтоўны дыялог аб перспектывах партнёрства павінен адбыцца сёлета, запланаваны візіт Кіраўніка беларускай дзяржавы ў Казахстан.
Беларусь і Казахстан блізкія эканамічныя і палітычныя партнёры ўжо доўгія гады
Наша краіна аказвае дружалюбнай дзяржаве дапамогу ў маштабных праектах, праграмах развіцця прамысловасці і АПК. На рынку прадэманстравана шырокая лінейка брэндаў беларускага аўтапрама. Летась МТЗ прадаў на рынку больш за 2 тыс. адзінак сваёй тэхнікі. Прадукцыя прапанавана практычна ў кожным рэгіёне краіны.
Адкрываюцца і сумесныя вытворчасці, прыклад таму зборка нашых трактароў у горадзе Кастанай. Больш за 200 машын не толькі сышлі з канвеера, але і знайшлі свайго ўладальніка. У наступным годзе плануюць выйсці на поўную магутнасць - выпускаць 3 тыс. адзінак за год.
У цэлым узаемадзеянне развіваецца ў адпаведнасці з дарожнай картай. Яе плануюць абнавіць падчас візіту беларускага лідара ў Казахстан. Новым паслом гэтай краіны ў Беларусі будзе Аскар Бейсенбаеў. Да прызначэння дэпутат сената парламента Казахстана. Дыпламату трэба будзе займацца і падрыхтоўкай сустрэчы кіраўнікоў дзяржаў.
