Беларусь заўсёды будзе надзейнай апорай для Арганізацыі Аб'яднаных Нацый. Аб гэтым Прэзідэнт Аляксандр Лукашэнка заявіў на сустрэчы з першым намеснікам Генеральнага сакратара ААН Амінай Махамед. Яна ўпершыню ў Беларусі. Як раз сёння ў Мінску адкрыўся рэгіянальны форум нацыянальных каардынатараў па дасягненні Мэт устойлівага развіцця.
На гістарычным саміце ААН, у 2015, вызначыліся з парадкам дня да 2030 года. Гэта значыць, якім быць свету ў найбліжэйшы час. Тады былі прынятыя мэты ўстойлівага развіцця. Гэта, прасцей кажучы, сацыяльна-эканамічныя арыенціры для дзяржаў на паўтара дзясятка гадоў. Іх адобрылі сусветныя лідары. Парадак дня 2030-га ўключае спіс з 17-ці мэт, накіраваных на ліквідацыю беднаты, барацьбу з няроўнасцю і несправядлівасцю, на рашэнне праблем, звязаных са зменай клімату. У выпрацоўцы 17-ці планетарных прыярытэтаў Беларусь прымала самы актыўны ўдзел. І ў нас зроблены шэраг пэўных крокаў для дасягнення гэтых мэт. Урадам адобрана Нацыянальная стратэгія ўстойлівага сацыяльна-эканамічнага развіцця на перыяд да 2030-га года. Выбудавана нацыянальная архітэктура па дасягненні мэт устойлівага развіцця. Праца ў гэтай сферы праводзіцца дзяржавай ва ўзаемадзеянні з бізнес-коламі, цывільным грамадствам і міжнароднымі арганізацыямі.
Рэгіянальны форум нацыянальных каардынатараў па дасягненні мэт устойлівага развіцця сабраў у Мінску прадстаўнікоў 40 краін. Сярод іх і пасланцы міжнародных арганізацый. Удзельнікі маштабнага форуму з Еўропы і Цэнтральнай Азіі сабраліся не выпадкова. Дзеляцца вопытам: як глабальныя мэты рэалізуюцца ў нацыянальнай палітыцы.
Аміна Махамед, першы намеснік Генеральнага сакратара ААН: "Дзякуй за гасціннасць, з якой мяне сустракаюць у Беларусі. Я хачу перадаць вам найлепшыя пажаданні ад вашага сябра - генеральнага сакратара ААН. Ён нават з лёгкай рэўнасцю паставіўся да таго, што менавіта я еду ў Беларусь, а не ён. Я хацела б сказаць, што ваша лідарства запатрабавана як ніколі. Лідарства і той голас за шматпалярнасць, за шматбаковае вырашэнне праблемных пытанняў, якія ўзнімае Беларусь на міжнароднай арэне. У сучасным свеце надта шмат канфліктаў, яны вельмі розныя ў залежнасці ад таго рэгіёна, дзе яны адбываюцца. Нам катэгарычна не хапае талерантнага стаўлення да самых розных сітуацый і праяў. Дзякуй за ваша лідарства".
