Развіццё дыялогу з Еўрасаюзам і новыя праекты са Стакгольмам і Хельсінкі

Прэзідэнт Беларусі сёння правёў сустрэчу адразу з двума міністрамі замежных спраў - Фінляндыі і Швецыі. Падчас зносін Аляксандр Лукашэнка заявіў: наша краіна  зацікаўлена ва ўзаемапаважлівых і добрасуседскіх адносінах з Еўрапейскім саюзам у цэлым.  І ў прыватнасці,  з дзяржавамі, якія прадстаўляюць госці.  Пазітыўна ўспрымаецца тое, што візіт праходзіць як раз  па заканчэнні ў Беларусі парламенцкіх выбараў.  Што да сітуацыі  ў рэгіёне і свеце, то само жыццё  падштурхоўвае да больш цеснага, а галоўнае - узаемавыгаднага партнёрства. Якія новыя праекты звяжуць Беларусь і краіны Паўночнай Еўропы, раскажа  Ілона Красуцкая.

Як вызначыць якасць адносін паміж краінамі? Частыя кантакты, ну, калі не поўнае ўзаемаразуменне, то  хоць бы імкненне і… мірны фон. Ну а людзям, народам, яшчэ важныя практычныя вынікі. Ужо з кім дабівацца іх разам, дык  з суседзямі. Відавочна, у гэтым плане чакаем  новыя праекты з краінамі Еўрасаюза. Кіраўнікі знешнепалітычных ведамстваў Фінляндыі і Швецыі сёння з візітам  у Мінску. 

Цёплы прыём ужо ў зімовай Беларусі для паўночных краін-суседак. Вось гэтак жа ў розныя гады складаліся і адносіны Беларусі з ЕС:  ад зусім халодных да тых, што ёсць зараз,   ужо сапраўды прыкметна пацяплела! 

Выбудоўваем і кропкавыя кантакты з краінамі Еўрасаюза. Гэта і абмен візітамі плюс наша краіна ўвесь час прадастаўляе пляцоўку для абмеркавання еўрапейскай архітэктуры бяспекі. Накшталт і рухаемся ў правільным кірунку, але не заўсёды так хутка, як жадалася б.  Сабрацца ў Мінску -  гэта была сумесная ініцыятыва міністраў замежных спраў. Беларусь, Фінляндыя, Швецыя - суседзі па рэгіёне, а значыць, і пытанні агульныя. Сустрэча праходзіць у той самай  зялёнай зале, дзе адбыліся гістарычныя перамовы "нармандскай чацвёркі". Аб Украіне сёння таксама гаварылі. 

А. Лукашэнка: у агульных інтарэсах, каб рэгіён стаў аазісам міру

Мабыць, самы доўгачаканы дакумент з той самай дагаворна-прававой базы - пагадненне аб спрашчэнні візавага рэжыму. Літаральна тыдзень назад Савет Еўрасаюза зацвердзіў рашэнне аб яго падпісанні з нашай краінай. Пасля ўступлення  ў сілу збор для беларусаў знізяць да 35 еўра. Рашэнне ў духу саюзніцтва. Наогул сёння часта гучала фраза "ў нас шмат агульнага". З краінамі Паўночнай Еўропы - гэта і гандлёвыя адносіны, і праекты ў самых розных сферах - ад дрэваапрацоўкі да лагістыкі. Ёсць сур'ёзныя перспектывы ў энергетыцы, экалогіі. Беларусь будуе атамную станцыю ў Астраўцы, Хельсінкі сваю Ханхіківі-1, і мы, у сваю чаргу, гатовы запазычаць фінскі вопыт па гарантаванні  бяспекі. 

Візіт, сапраўды, унікальны. Абодва міністры адносна нядаўна заступілі на пасады, і вось адразу такая ініцыятыва. Да таго ж міністр замежных спраў Фінляндыі прадстаўляе  краіну, якая старшынствуе зараз у Савеце ЕС. А кіраўнік МЗС Швецыі і ўвогуле ўпершыню ў Беларусі. Нягледзячы няпростыя эпізоды ў мінулым, гэты факт падкрэслівае новую старонку ў адносінах. Як раз напярэдадні візіту з'явілася знакавае паведамленне - Міністэрства замежных спраў Швецыі афіцыйна пераходзіць да выкарыстання назвы Беларусь замест ранейшага "Белая Расія". Вось такія былі нюансы перакладу. Усё для таго,  каб падкрэсліць нацыянальную ідэнтычнасць і суверэнітэт нашай краіны. Вось ужо, праўда, з чыстага ліста.