Развіццё беларуска-ўкраінскіх адносін і вырашэнне крызісу ў Данбасе.
Гэтыя тэмы абмяркоўваліся сёння на сустрэчы Прэзідэнта Аляксандра Лукашэнкі з Яўгенам Марчуком, які ў канцы мінулага года быў прызначаны афіцыйным прадстаўніком Кіева ў трохбаковай кантактнай групе па мірным урэгуляванні сітуацыі ў Данецкай і Луганскай абласцях. Яўген Марчук перш за ўсё адзначыў пазітыў у двухбаковых кантактах пасля мінулага Форуму рэгіёнаў Беларусі і Украіны. Аляксандр Лукашэнка ўпэўнены, што нашы дзяржавы могуць значна дадаць у гандлі. Цяперашні тавараабарот у 5 з паловай мільярдаў долараў не адпавядае патэнцыялу краін. Такой жа пазіцыі прытрымліваецца і афіцыйны Кіеў.
Палітык чацвёрты год удзельнічае ў перагаворным працэсе па вырашэнні крызісу на ўсходзе Украіны. Раней працаваў у падгрупе па бяспецы. Гэта адна з тых, што дзейнічае ў рамках трохбаковай кантактнай групы. Таксама ёсць палітычная, эканамічная і гуманітарная падгрупы. Іх пасяджэнні рэгулярна праводзяцца ў беларускай сталіцы з мая 2015. Яўген Марчук распавёў беларускаму лідару пра сітуацыю на ўсходзе Украіны і адчувальных момантах у перагаворным працэсе па пытаннях спынення агню і абмену заложнікамі. Каляднае перамір'е, аб якім дамовіліся ў Мінску ў канцы 2018, дапамагло значна скараціць колькасць абстрэлаў. Прадстаўнік Украіны адзначыў, што апроч ваенных аспектаў на сустрэчах рабочых падгруп абмяркоўваюцца і шматлікія канкрэтныя пытанні, звязаныя з жыццём насельніцтва ў Данбасе. Гэта забяспечанасць вадой, рамонт інфраструктуры, транспарт, выплаты пенсій. Паводле слоў Марчука, мінскі працэс - гэта адзіная пляцоўка, дзе можна дамаўляцца.
Яўген Марчук, прадстаўнік Украіны ў трохбаковай кантактнай групе па мірным урэгуляванні сітуацыі ў Данецкай і Луганскай абласцях: "Многіх не цікавяць пытанні гуманітарнага, чалавечага характару, а без іх практычна нідзе не адбывалася ўрэгуляванне. Калі ідзе вайна, паміж бакамі ўзрастае вялізны недавер. А гэта значыць, што вельмі складана дамаўляцца. Таму нават маленькія дамоўленасці, якія адбыліся, яны па міліметры разбураюць велізарны вал недаверу. Мінская пляцоўка - адзіная, дзе можна дамаўляцца".
Плануецца, што чарговая сустрэча трохбаковай кантактнай групы пройдзе ў Мінску заўтра.
