Распрацоўкай законапраекта аб амністыі ў сувязі з 75-годдзем вызвалення Беларусі зоймуцца Вярхоўны суд і МУС. Такое даручэнне Кіраўніка дзяржавы прагучала напярэдадні падчас сустрэчы з Валянцінам Сукалам.
Дагэтуль амністыя праводзілася без малога 5 гадоў таму. Акрамя таго, на сустрэчы абмеркавалі і работу судовай сістэмы. Галоўны акцэнт беларускага лідара - на справядлівасці, бо сёння гэта не толькі падмурак функцыянавання правасуддзя, але і аснова дзяржаўнай палітыкі.
Таксама Кіраўнік дзяржавы звярнуў увагу на парушэнні закона самімі суддзямі і недапушчальнасць такіх паводзін. Перад законам усе роўныя, адзначыў беларускі лідар. Прадметна функцыянаванне судовай сістэмы будзе разгледжана на нарадзе ў пачатку красавіка, а ўжо ў найбліжэйшы час адбудзецца маштабная сустрэча з прадстаўнікамі сілавога блока нашай краіны, дзе абмяркуюць перспектывы развіцця праваахоўнай сістэмы ў цэлым.
Таксама Валянцін Сукала адзначыў магчымасці новага Палаца правасуддзя. Яго адкрыццё запланавана на пачатак красавіка. Палепшаны функцыянал і сучасная тэхніка дазволяць аптымізаваць працу суддзяў і павысіць эфектыўнасць самой сістэмы. Напрыклад, будзе абсталявана 16 залаў для правядзення пасяджэнняў, з'явіцца магчымасць допыту сведак, што знаходзяцца пад абаронай. Пра гэта і не толькі глядзіце ў праекце АТН "Размова ў Прэзідэнта" на нашым сайце і YouTube-канале Агенцтва тэленавін.
