Транспартная сфера Беларусі: эканамічны эфект і магчымасці, якія нельга ўпусціць. Першы ўчастак другой мінскай кальцавой павінен быць завершаны да канца гэтага года. Аб гэтым сёння ішла размова падчас рабочай сустрэчы Прэзідэнта з міністрам транспарту і камунікацый Анатолем Сіваком. Зрэшты, гутарка выйшла далёка за рамкі сталічных транспартных магчымасцяў. Па-першае, транзіт і лагістыка - сферы, на якіх Беларусь можа і павінна зарабляць. Абмяркоўвалася і яшчэ адна прыбытковая тэма - разведка карысных выкапняў. Гэтае пытанне Кіраўнік дзяржавы дэтальна абмеркаваў з новаспечаным міністрам прыродных рэсурсаў і аховы навакольнага асяроддзя.
Поўная карціна рабочага дня Кіраўніка дзяржавы - у Ілоны Красуцкай.
Першыя гутаркі аб тым, што кальцавую трэба разгрузіць, пачаліся пяць гадоў назад. Па-першае, пікавы трафік часам дасягае 120-ці тысяч машын за суткі, а, па-другое, безумоўна, пакутуе экалогія. Вырашылі: МКАД-2 быць! Ініцыятарам праекта быў асабіста Кіраўнік дзяржавы. У ліпені мінулага года другая кальцавая абзавялася першым кіламетрам.
Праз некалькі месяцаў Кіраўнік дзяржавы наведвае будаўнічую пляцоўку другой аб'язной. Тады Прэзідэнт ставіць задачу: МКАД-2 павінна быць пабудаваная да 1 студзеня 2017 года.
Сёння да гэтага пытання на ўзроўні Прэзідэнта вярнуліся зноў. Аб тэмпах і якасці будаўніцтва другога кальца Кіраўніку дзяржавы далажыў міністр транспарту і камунікацый Анатоль Сівак. МКАД-2 будзе ў тры разы даўжэйшай за сваю папярэдніцу - 160 км.
Паўночнае паўкола пачынаецца ад трасы М-3 Мінск - Віцебск каля Астрашыцкага Гарадка. Ля вёсак Пятрышкі дарога паварочвае на паўднёвы захад да трасы М-6/Е28 Мінск - Гродна.
Паўднёва-заходняе паўкола працягнецца ад аўтадарогі М-6/E 28 з выхадам на 340-ты кіламетр трасы М-1/E 30 Брэст - Мінск - мяжа Расійскай Федэрацыі.
Далей другая кальцавая аўтадарога пойдзе па ўжо пракладзеных трасах М-1, М-2 і Р-80.
Першы этап - 44 км (участак ад віцебскай да гродзенскай трасы) завершаць сёлета.
МКАД-2 будзе цалкам "бетонкай". Рашэнне практычнае з усіх бакоў. Навошта плаціць замежным кампаніям за сыравіну, калі ўласнай у лішку. Мадэрнізацыя цэментных заводаў дазволіла нарасціць аб'ёмы. Ды і потым, даўгавечнасць асфальту максімум - сем гадоў, калі "гарантыйны пашпарт" цэментабетоннага пакрыцця абяцае 25.
Два гады назад у Беларусі запрацавала электронная сістэма платных дарог BelToll. Гэта сумесны праект Міністэрства транспарту і аўстрыйскай кампаніі. Зараз колькасць карыстальнікаў сістэмы дасягнула больш як 210 тысяч. А працягласць сеткі платных аўтамагістраляў у краіне складае амаль тысяча 200 кіламетраў. Гэтую лічбу чакае дадатак. Не выключана, што да канца года платнай стане і траса Жлобін - Гомель.
А каб наступная тэма прынесла краіне прыбытак, прыйдзецца капнуць глыбока. Кіраўнік дзяржавы сустрэўся з міністрам прыродных рэсурсаў і аховы навакольнага асяроддзя. На гэтай пасадзе Андрэй Каўхута крыху больш за месяц, і гэта яго першая грунтоўная гутарка з Аляксандрам Лукашэнкам. Да новаспечанага міністра ў Кіраўніка дзяржавы некалькі даручэнняў. Сярод іх - актыўная работа па разведцы карысных выкапняў. Гэтае пытанне разгледзяць у канцы года на тэматычнай нарадзе з удзелам Кіраўніка дзяржавы. Чакае Прэзідэнт і ініцыятыў па лініі міжнароднага супрацоўніцтва.
Туркменістан. Гарлыкскі горна-абагачальны камбінат. Гэты праект не мае аналагаў у Цэнтральнай Азіі. Да яго падбіраліся даўно, але беспаспяхова. Узяліся толькі беларусы. Для гэтага ў нас ёсць больш чым паўвекавы вопыт праектавання і будаўніцтва калійных камбінатаў. Беларуссю тут рэалізуецца "пакетны прынцып": праектаванне - будаўніцтва пад ключ - падрыхтоўка кадраў. Кошт пытання - мільярд долараў. І вось на Гарлыку здабыта і выдадзена на склад першая калійная руда. 1 жніўня яе плануюць адправіць для перапрацоўкі ў Салігорск.
Пасля размовы ў Кіраўніка дзяржавы Андрэй Каўхута пагутарыў з журналістамі. Сярод іншага гаварылі і аб ахове прыроды.
Прадстаўленне, што ў Беларусі няма прыродных выкапняў, у корані няправільна. Буры вугаль, гаручыя сланцы, калійныя і жалезныя руды. Перспектыўныя радовішчы ёсць. Патрэбна дэтальная разведка і ўвядзенне ў прамысловае асваенне.
