Рабочая паездка Аляксандра Лукашэнкі ў Кыргызстан. Заўтра Прэзідэнт возьме ўдзел у саміце АДКБ

27 Лістапада 2019
Пытанні бяспекі і рэгіянальнай стабільнасці  гэтымі днямі абмяркоўваюць у Бішкеку. У Кыргызстан з рабочым візітам прыбыў і Прэзідэнт Беларусі. Аляксандр Лукашэнка возьме ўдзел у саміце АДКБ. 

Гэта ваенна-палітычны саюз. На сённяшні дзень у яго ўваходзяць 6 дзяржаў - Арменія, Беларусь, Казахстан, Кыргызстан, Расія і Таджыкістан. І галоўнай задачай арганізацыі з'яўляецца гарантаванне бяспекі  на ўсёй прасторы краін - удзельніц дагавора, а таксама барацьба з міжнародным тэрарызмам.

Вышэйшым органам АДКБ з'яўляецца Савет калектыўнай бяспекі.  Інтарэсы краін у ім прадстаўляюць, вядома, лідары. Чарговая сесія савета  пройдзе заўтра ў Бішкеку. На такіх сустрэчах звычайна разглядаюцца прынцыповыя пытанні працы ваенна-палітычнага блока.

У Бішкеку Аляксандр Лукашэнка акрэсліць пазіцыю і асноўныя прапановы нашай краіны па развіцці і ўмацаванні матрыцы рэгіянальнай і міжнароднай бяспекі. 

У парадку дня, як вядома, і праблемы на таджыкска-афганскай мяжы, і праца з ААН у рамках глабальнай антытэрарыстычнай стратэгіі, і пытанні абароны ў інфармацыйнай сферы. Па выніках працы сесіі Савета калектыўнай бяспекі АДКБ бакі падпішуць шэраг дакументаў, якія павінны палепшыць узаемадзеянне краін - удзельніц арганізацыі.  Па традыцыі на палях саміту Кіраўнік беларускай дзяржавы правядзе сустрэчы і перамовы з замежнымі калегамі. Сёння напярэдадні саміту гадзіннікі зверылі міністры замежных спраў, кіраўнікі абаронных ведамстваў краін - удзельніц арганізацыі і сакратары саветаў бяспекі. 

Усе падрабязнасці з Бішкека даведаемся ў нашага палітычнага аглядальніка Вольгі Макей. 

Будучая сустрэча лідараў АДКБ праходзіць пры спакойным інфармацыйным фоне, без уласцівай самітам шуміхі, недагаворванняў, чутак. Парадак дня ў прэсе акрэсліваецца даволі стандартна. У ім каля 20 пытанняў, сярод якіх, напрыклад, план дзеянняў па рэалізацыі контртэрарыстычнай стратэгіі ААН да 2021 года, умацаванне таджыкска-афганскай мяжы, правядзенне сумесных вучэнняў. Вядома, разгледзяць бюджэт на наступны год. Напэўна, афіцыйна аб’явяць імя генеральнага сакратара АДКБ. З 1 студзеня на найбліжэйшыя тры гады гэту пасаду павінен заняць Станіслаў Зась. 


Кыргызстан рыхтуецца прыняць саміт АДКБ


З таго, чаго няма ў парадку дня, імаверна, кіраўнікі дзяржаў абмяркуюць вучэнні НАТА, якія пройдуць вясной. Яны выклікаюць занепакоенасць не толькі ў Беларусі, але і ў краін АДКБ, бо гэта заходняя мяжа ўсяго блока. Гэтую тэму апошнім часам актыўна абмяркоўваюць і ваенныя эксперты.  Безумоўна, трэніроўкі праводзяць і вайскоўцы краін АДКБ. Толькі назва манеўраў "Баявое братэрства" гучыць больш мірна, чым тыя, што выбірае Паўночнаатлантычны альянс. Адрозніваецца і сутнасць: у вучэннях АДКБ, якія ў кастрычніку прайшлі на тэрыторыях трох краін, адпрацоўвалі ў першую чаргу контртэрарыстычныя мерапрыемствы. На тэрыторыі Расіі прайшлі вучэнні брыгад матэрыяльна-тэхнічнага забеспячэння і адпрацоўка лакалізацыі прыгранічнага канфлікту. У Беларусі  трэніраваліся сілы разведкі. У Таджыкістане - міратворцы. 


Міжнародная і рэгіянальная бяспека


Як умацаваць бяспеку ў рэгіёне, сёння ў Бішкеку за адным сталом абмяркоўваюць міністры замежных спраў, абароны і сакратары саветаў бяспекі АДКБ. Як жартуюць журналісты,  усе вялікія зоркі аб'яднання сышліся ў адным месцы. Гэта, вядома, пра пагоны. Але гэта той выпадак, калі важна зверыць гадзіннікі (не час, а ён ва ўсіх краін розны), а пазіцыі: у дыпламатыі, абароне і бяспецы. 

Зрэшты, сёння не трэба быць ваенным аналітыкам, каб зразумець, што ў сучасным свеце вайна ўжо не тая. Дастаткова проста адкрыць інфармацыйныя стужкі. Менавіта там часам і вядуцца жорсткія баі. Дадаць да гэтага сацсеткі і іншыя інтэрнэт-кам'юніці і становіцца зразумела, што абараняць сёння любую краіну трэба не толькі рэальна, але і віртуальна. Такое пагадненне аб гарантаванні інфармацыйнай бяспекі дзейнічае і ў АДКБ. Дарэчы, Беларусь ратыфікавала яго першай. 

Тэма інфармацыйнай бяспекі таксама ў парадку дня заўтрашняй сустрэчы на вышэйшым узроўні. Кіраўнікі дзяржаў ужо прыбываюць у Кыргызстан. Мясцовых жыхароў у Бішкеку просяць аднесціся з разуменнем да візіту першых асоб, бо некаторыя вуліцы сталіцы перакрыюць. Не надоўга, толькі для праезду картэжаў.  У па-сапраўднаму зімовы Бішкек (сёння тут мінус 8)  беларускі борт нумар адзін прыбыў вечарам. Па мясцовай традыцыі гасцей сустракаюць дзяўчаты ў нацыянальных уборах. А замест звыклых беларусам хлеба-солі традыцыйны кыргызскі пачастунак баарсок. 

Дарэчы, ужо сёння ў лідараў ваенна-палітычнага блока была магчымасць пагаварыць у нефармальнай абстаноўцы. Прэзідэнт Кыргызстана запрасіў калег на вячэру. Але гэта, як гаворыцца, без прэсы. 


Заўтра ў Бішкеку пройдзе саміт АДКБ


Такія саміты ў першую чаргу і нам, журналістам, і экспертам, і ваенным аналітыкам цікавыя тым, што менавіта тут з першых вуснаў (г.з. непасрэдна ад кіраўнікоў дзяржаў) прагучаць ацэнкі міжнароднага становішча, шляхі вырашэння, ініцыятывы. Усё гэта пачуем ужо заўтра. Па праграме саміт стартуе ў 11:00, па мінскім часе  гэта 8 раніцы.