Праекты завода "Штадлер Мінск" абмеркавалі на сустрэчы ў Прэзідэнта

Хуткія, стыльныя, ультрасучасныя… Візітная картка нашай чыгункі, а зусім хутка і мінскага метрапалітэна. Напярэдадні інавацыйны састаў, які будзе курсіраваць у сталічнай падземцы, "Штадлер Мінск" прэзентаваў прэсе і грамадскасці. Сёння ж будучыя праекты і ў цэлым працу завода абмеркавалі на сустрэчы ў Прэзідэнта. Гарызонты высокіх тэхналогій пашыраюцца, інавацыі прыходзяць ва ўсе сферы жыцця, што пазітыўна адлюстроўваецца на іміджы краіны. А значыць, дзяржава абавязана ствараць умовы для развіцця высокатэхналагічных вытворчасцяў. І "Штадлер Мінск" яркае пацвярджэнне - Беларусь для гэтага камфортная пляцоўка. Адзначым, прадукцыя завода пастаўляецца не толькі на рынак ЕАЭС. Тут збіраюць цягнікі для Нарвегіі, двухпавярховыя саставы для Венгрыі і Славеніі. Таксама выпускаюць трамваі для Балівіі.

Усе падрабязнасці сустрэчы на вышэйшым узроўні ў Веранікі Буты. 

"Штадлер Мінск" - самы сучасны завод швейцарскага канцэрна. Прадпрыемства ў Фаніпалі пабудавалі практычна з нуля. Паставілі туды вядучыя тэхналогіі. І за адносна кароткі час досыць гучна заявілі пра сябе, прычым не толькі на постсавецкім рынку, як першапачаткова планавалася. Палова заказаў на Еўропу.

У нас збіраюць цягнікі для Нарвегіі, двухпавярховыя саставы для Венгрыі і Славеніі і нават трамваі для Балівіі. Камфортнымі электрычкамі, вядома, не здзівіць сёння і беларускіх пасажыраў. Сёлета з канвеера ў Фаніпалі сыдуць 350 вагонаў, для параўнання - у 2018 годзе іх было 120 - рост амаль у тры разы. 

Філіп Брунер, дырэктар ЗАТ "Штадлер Мінск": "Вось мы гатовыя адгэтуль паставіць у любую краіну. У нас ёсць сертыфікацыі - усё па еўрапейскай норме, усё па TSC прыкладна ды для Еўропы, усё па норме ДСТ".

І яшчэ некалькі лічбаў. З моманту заснавання завода яго магутнасць вырасла больш як у два разы, у пяць разоў павялічыўся штат працаўнікоў. 

Аляксандр Турчын, першы намеснік Прэм'ер-міністра Беларусі: "Мая цвёрдая перакананасць у тым, што сённяшняе прадпрыемства цалкам адказвае патрабаванням Прэзідэнта. Што я маю на ўвазе? Інавацыйна, годны ўзровень аплаты працы. Парадку тысячы супрацоўнікаў, якія працуюць на гэтым прадпрыемстве, больш як дзве тысячы ўзровень заработнай платы. Дыверсіфікацыя экспарту - тое, што патрабуе Кіраўнік дзяржавы - 30-30-30  - тут усё рэалізавана".

У дэталях працу сумеснага прадпрыемства абмеркавалі сёння ў Палацы Незалежнасці. "У Беларусі мы стварылі сапраўды годнае прадпрыемства", - адзначыць Аляксандр Лукашэнка. - "Штадлер" сваім прыкладам даказаў, што няма нічога немагчымага. Што можна прыцягваць інвестараў і што трэба адкрываць такія вытворчасці”. 

Гэта кадры таго самага дня, якія ўспамінае Прэзідэнт. 2011 год. Запуск першага хуткаснага цягніка гарадскіх ліній. 

Усяго год праз у фундамент будучага завода ўжо закладваем сімвалічную капсулу. 

А яшчэ праз два - урачыста пераразаем чырвоную стужку і даём старт пачатку ў Беларусі найноўшай высокатэхналагічнай вытворчасці чыгуначнага электратранспарту. 

У той факт, што "Штадлер" прыйшоў у Беларусь сур'ёзна і надоўга, верылі нямногія. Тым часам за гэтыя гады ў наша прадпрыемства інвеставалі парадку 90 млн еўра. Зараз у Фаніпалі самы абсталяваны завод швейцарскай сеткі, а гэта 20 падраздзяленняў па ўсім свеце. Працу кампаніі ў нашай краіне не раз ставіў у прыклад іншым замежным партнёрам Аляксандр Лукашэнка. І гэтыя пачуцці ўзаемныя. 

Петэр Шпулер, старшыня адміністрацыйнага савета, уладальнік кампаніі "Штадлер Рэйл Груп": "Як уласнік "Штадлер" магу сказаць, што я захоплены ўмовамі працы ў Беларусі. Гэта датычыцца і эканамічных умоў, і прафесійнай падрыхтоўкі супрацоўнікаў. Гэта знак якасці для любой нацыянальнай эканомікі. Мы пачалі сваю працу тут сем гадоў таму ў чыстым полі. Мы стварылі сучасную вытворчасць, мабыць, самую сучасную ва ўсёй групе кампаній "Штадлер". Той стандарт якасці, па якім мы працуем тут, абсалютна адпавядае нямецкаму або швейцарскаму. Тут вельмі добра падрыхтаваныя, добра адукаваныя супрацоўнікі, дзякуючы гэтаму мы можам выходзіць не толькі на беларускі, але і на глабальны рынак".

Швейцарскую якасць, зробленую беларускімі рукамі, яшчэ раз прадэманстравалі напярэдадні. Журналістам прэзентавалі новы цягнік для мінскага метро. Ужо ў канцы месяца састаў пачне курсіраваць на другой лініі - але гэта толькі абкатка, першых пасажыраў цягнік прыме восенню. 

Аляксандр Лукашэнка, вядома ж, не мог абысці гэтую навіну і сёння. Магчыма, чарговы іх сумесны тэст-драйв дасць старт яшчэ аднаму цікаваму праекту. 

Гэта інавацыйны састаў, не мае аналагаў у СНД. На заводзе такіх збіраюць шэсць электрычак. Яшчэ чатыры - план на 2020 год. Запусцяць іх на трэцяй ветцы. Новымі саставамі з часам абновяць увесь парк метрапалітэна. 

Вопыт паспяховага беларуска-швейцарскага праекта перанясуць і на іншыя прадпрыемствы. Так, завод у Асіповічах, дзе існуе вытворчасць грузавых вагонаў, ужо звярнуўся да кіраўніка "Штадлера" па параду, як прадаваць на Еўропу. 

Петэр Шпулер, старшыня адміністрацыйнага савета, уладальнік кампаніі "Штадлер Рэйл Груп": "У нас была размова з кіраўніком Беларускай чыгункі аб тым, што ў Асіповічах ёсць вытворчасць грузавых вагонаў. Нам прапанавалі пасадзейнічаць збыту іх прадукцыі на рынках Заходняй Еўропы. Пакуль усё выглядае нядрэнна. Спадзяюся, мы зможам тут наладзіць супрацоўніцтва. 

Ведаеце, я шмат падарожнічаю па ўсім свеце і заўсёды рэкламірую Беларусь. На гэты раз я запрасіў сюды бізнесмена з Бельгіі. Разам мы валодаем самым вялікім у свеце прадпрыемствам па вытворчасці тэкстыльных станкоў. Ён проста захоплены вашай краінай. І нават абмяркоўвае з вашым урадам перспектывы магчыма яшчэ аднаго сумеснага праекта".

Не, праект, які прапаноўвае бельгійскі інвестар - клічуць яго Люк Так - пакуль ніяк не звязаны з тэкстыльным абсталяваннем. Ён са сферы вытворчасці і продажу ўдабрэнняў. Па геаграфіі - разглядаюць Гродна. А вось дэталі спадар Шпулер раскрываць не стаў, грошы любяць цішыню, асабліва на стадыі першых перамоў. Але запэўніў, калі ёсць у бакоў разуменне, будуць і інвестыцыі. Што датычыцца ўмоў для развіцця  высокатэхналагічных вытворчасцяў, яны ў Беларусі ёсць у поўнай меры.