Некалькі гадзін таму прайшла афіцыйная цырымонія сустрэчы Аляксандра Лукашэнкі і Пранаба Мукерджы. Прамая трансляцыя вялася на тэлеканалах "Беларусь 1" і "Беларусь 24". Кіраўнік дзяржавы Аляксандр Лукашэнка асабіста сустрэў індыйскага калегу ля Палаца Незалежнасці. Пранаба Мукерджы прымалі як высокага госця, па ўсіх правілах дзяржпратакола - з ротай ганаровай варты, чырвонай дарожкай і гімнамі дзвюх краін.
Прадставіўшы адзін аднаму членаў дэлегацый, Аляксандр Лукашэнка і Пранаб Мукерджы адправіліся ў Палац Незалежнасці на перамовы ў вузкім фармаце. Кіраўнік беларускай дзяржавы падкрэсліў, што наша краіна хацела б больш глыбокіх і шырокіх адносін з Індыяй.
Аляксандр Лукашэнка, Прэзідэнт Рэспублікі Беларусь: "Спробы ізаляваць Беларусь, неяк паставіць на месца, націснуць бесперспектыўныя, пакуль мы маем адносіны з такімі гіганцкімі дзяржавамі, як ваша. Напярэдадні Вашага візіту ў Беларусь з аднаго і другога боку, як мяне інфармавалі, яшчэ даволі скептыкаў наконт паглыблення нашага супрацоўніцтва. Напэўна, будзе правільна, калі мы такіх людзей добра расчаруем і зробім максімум для таго, каб нашы адносіны былі маштабнымі".
Пранаб Мукерджы, Прэзідэнт Індыі: "Вялікі дзякуй, спадар Прэзідэнт. Хачу выказаць падзяку за цёплую гасціннасць, аказаную мне і маёй дэлегацыі. Гэты візіт - доказ таго, наколькі Індыя зацікаўлена ў паглыбленні і пашырэнні супрацоўніцтва з Беларуссю. Індыя з тых некалькіх краін, якая адразу прызнала незалежнасць Беларусі і ўсталявала дыпадносіны. Мы хочам мець блізкія двухбаковыя адносіны, як гэта было падчас Савецкага Саюза".
Пасля кіраўнікі дзяржаў пагутарылі ў пашыраным фармаце, дзе абмеркавалі ўсе магчымыя варыянты супрацоўніцтва. Аляксандр Лукашэнка прапанаваў прэзідэнту Індыі рэалізаваць сумесныя з Беларуссю праекты ў горнай здабычы і нафтагазавым сектары. Сярод ініцыятыў і арганізацыя сумеснай вытворчасці тэхнікі для выхаду на рынкі Паўднёва-Усходняй Азіі.
Аляксандр Лукашэнка, Прэзідэнт Рэспублікі Беларусь: "З першых дзён незалежнасці Беларусі ваша краіна стала нашым верным і надзейным сябрам. За больш як 20-гадовую гісторыю дыпламатычных адносін мы наладзілі паўнавартасны партнёрскі дыялог. Сёння Беларусь гатова да яшчэ больш цеснага двухбаковага супрацоўніцтва. Прыйшоў час для новых праектаў як у прамысловасці, так і гуманітарнай сферы. Валодаючы сучаснымі тэхналогіямі, абсталяваннем, мы гатовыя ўдзельнічаць у мадэрнізацыі горназдабыўной галіны Індыі, павышэнні прадукцыйнасці яе нафтагазавага сектара. У найбліжэйшыя гады Індыя плануе значна павялічыць здабычу вугля, што запатрабуе прыцягнення дадатковай тэхнікі для такой распрацоўкі. У Індыі ўжо працуюць велікагрузныя аўтамабілі БелАЗ і паказваюць высокія эксплуатацыйныя характарыстыкі. Мы прапануем завяршыць да канца 2015 года стварэнне ў вашай краіне ўласнага цэнтра сэрвіснага абслугоўвання такіх складаных машын".
Пранаб Мукерджы, Прэзідэнт Індыі: "У Беларусі і Індыі дружалюбныя і трывалыя адносіны ва ўсіх сферах. Мы супрацоўнічаем і на міжнароднай арэне. Галоўнае - нам трэба ўзмацніць узаемадзеянне гандлёва-эканамічных сувязяў. Мы павінны хутчэй перасягнуць цяперашнюю адзнаку 400 мільёнаў долараў".
