Ад аналагу да лічбы на базе высокіх і, галоўнае, айчынных тэхналогій. Прэзідэнту сёння прад'явілі вынік комплекснай мадэрнізацыі сістэмы спецыяльнай урадавай сувязі. Для любой дзяржавы гэтыя вузлы, тэхніка і тэхналогіі з'яўляюцца найболей адчувальнымі і строга ахоўваюцца. Гэта важны элемент прыняцця суверэнных дзяржаўных рашэнняў і абароны нацыянальных інтарэсаў, у тым ліку тых, што ўяўляюць сабою дзяржаўную таямніцу. Пасля некалькіх скандалаў з праслухоўваннем вышэйшых службовых асоб Еўрапейскага саюза і Амерыкі і гучных уцечак з дыпламатычных крыніц увага да абароны такіх сістэм вырасла на парадак ва ўсім свеце. Беларусь - не выключэнне. Тры найважнейшыя крытэрыі мадэрнізацыі - абароненасць, якасць і надзейнасць.
У прыватнасці, Прэзідэнту далажылі аб распрацоўцы сістэм рухомай урадавай радыёсувязі. Плюс прадэманстравалі найноўшую лінейку апаратуры шыфравання, у тым ліку абароненай мабільнай сувязі. Дзякуючы лічбавізацыі айчынныя комплексы становяцца больш кампактнымі і надзейнымі. Так, перасоўны вузел сувязі наступнага пакалення кіруецца экіпажам усяго з трох чалавек наўзамен ранейшых 11 і выконвае задачы шырэйшага спектру. Яго прымуць на ўзбраенне ўжо ў наступным годзе. Аляксандр Лукашэнка паабяцаў і надалей аказваць падтрымку гэтаму закрытаму, але высокатэхналагічнаму сектару. Аднак наўзамен запатрабаваў безумоўнай якасці і эфектыўнасці ад кожнага праекта і заказчыка.
На аб'екце Галоўнакамандуючаму таксама паказалі рухомы комплекс тэхнічнага кіравання контртэрарыстычнай аперацыяй. Ён здольны запускаць дроны, выяўляць і знішчаць беспілотнікі. А гэта, на жаль, стала нязменным атрыбутам любога сучаснага канфлікту. Сёння комплекс праходзіць дзяржаўныя выпрабаванні. Ацэньваючы ўбачанае і падводзячы вынікі, Прэзідэнт дапусціў, што падраздзяленне можа быць выведзена са складу КДБ і атрымае большую самастойнасць. Аднак гаворачы аб удасканаленні найноўшых сістэм лічбавай бяспекі, лідар нагадаў аб прыярытэце абароны правоў чалавека, гарантам якіх, паводле канстытуцыі, Аляксандр Лукашэнка з'яўляецца.
Нагадаем, аб прамежкавых выніках мадэрнізацыі сістэм урадавай сувязі кіраўнік КДБ дакладваў Прэзідэнту ў пачатку мінулага года. Менавіта тады прагучалі выразныя даручэнні зрабіць упор на якасць, абароненасць і эфектыўнасць кожнага праекта. Як выкананыя даручэнні, лідар сёння ацаніў асабіста.
