У Палацы Незалежнасці пройдуць перамовы Аляксандра Лукашэнкі і Нікаласа Мадуры. Лідары сустрэнуцца адзін на адзін, затым - у пашыраным складзе з удзелам дэлегацый. Бакі разгледзяць гандлёва-эканамічнае супрацоўніцтва, рэалізацыю двухбаковых праектаў, працу зборачных вытворчасцяў і развіццё кантактаў АПК, будаўнічай і нафтагазавай сферы.
Цырымонію афіцыйнай сустрэчы прэзідэнта Венесуэлы можна ўбачыць сёння ў прамым эфіры ў 11 гадзін на сайце tvr.by і на YouTube-канале Белтэлерадыёкампаніі.
У Беларусі і Венесуэлы працуюць каля 85 сумесных праектаў. Нашы спецыялісты будуюць у Баліварыянскай Рэспубліцы шматкватэрныя дамы, дзеляцца вопытам у сельскай гаспадарцы. Плануецца, што сёння Нікалас Мадура прыме ўдзел у цырымоніі адкрыцця ў Мінску помніка нацыянальнаму герою Венесуэлы Сімону Балівару.
