Прэзідэнт сёння заслухаў даклад аб экспарце круглых лесаматэрыялаў. Са студзеня мінулага года ўказам Кіраўніка дзяржавы ўведзена забарона паставак за мяжу неапрацаванай драўніны. Выключэнне складаюць толькі форс-мажорныя акалічнасці, напрыклад, масавы вал дрэў з-за ўрагану. У 2016-м і першай палове гэтага года Мінлясгас атрымаў дазвол экспартаваць 4 мільёны кубаметраў сыравіны. Гэта распілаванае бярвенне, у тым ліку і лес, павалены ліпеньскімі ўраганамі. У краіне назіраецца прафіцыт сыравіны. Летась нарыхтаваны рэкордны аб'ём - 21 млн кубаметраў. З-за таго, што некаторыя прадпрыемствы канцэрна “Беллеспаперпрам” не загружаныя, бо знаходзяцца ў стадыі мадэрнізацыі, урад прапаноўвае падоўжыць дзеянне квот. Экспарт лесу не разглядаецца як самамэта. Асноўная задача, па-ранейшаму, у забеспячэнні сыравінай унутранага рынку і як вынік - выпуску экспартаарыентаванай прадукцыі.
Сёлета за мяжу адправіцца партыя ў амаль два мільёны кубаметраў круглага лесу. Тым не менш Кіраўнік дзяржавы папярэдзіў Мінлясгас, што гэты дазвол стане апошнім. Патрабаванне нязменнае: уся драўніна павінна перапрацоўвацца ўнутры краіны. У лістападзе адкрыецца новы завод Светлагорскага цэлюлозна-кардоннага камбіната. Менавіта на гэта прадпрыемства будзе пастаўляцца той аб'ём драўніны, які зараз экспартуецца за мяжу ў круглым выглядзе.
Міхаіл Амельяновіч, Міністр лясной гаспадаркі Беларусі: "Баланс, які распрацаваў Мінэканомікі сумесна з Мінлясгасам, ён паказвае, што пры поўнай загрузцы прадпрыемстваў канцэрна і прыватных прадпрыемстваў у нас дастаткова сыравіны. Цалкам мы сваёй сыравінай загрузім гэтыя прадпрыемствы. З-за такіх нестыковак, дзе прадпрыемствы працуюць не на поўную магутнасць, атрымліваецца вольная рэшта, прафіцыт сыравіны. Таму мы і звярнуліся да Кіраўніка дзяржавы, каб ён гэты прафіцыт даў нам адправіць на экспарт. Каб ён тут не гніў, не страчваў свае якасці, а атрымалі дадатковую валютную выручку для краіны і паставіць гэты невялікі аб'ём на экспарт".
Сярод ключавых даручэнняў Прэзідэнта - выкараненне шэрых схем вывазу драўніны. Урад ужо прыняў меры, каб піловачнік не ішоў на экспарт пад выглядам калоў і слупоў. Пастанова аб ліцэнзаванні гэтых відаў прадукцыі ўступае ў сілу 1 лютага. А вось дата 1 мая стане апошняй для навядзення парадку ў лясах Беларусі. Караць будуць рублём. Кіраўнік дзяржавы прапануе павялічыць штрафы за вываз смецця на тэрыторыю лясных масіваў.