Патрабаванні да дысцыпліны на прадпрыемствах будуць значна ўзмацняцца. Аб гэтым заявіў Прэзідэнт на нарадзе з кіраўніцтвам Жыткавіцкага райвыканкама і прадпрыемстваў раёна. У гутарцы з кіраўніцтвам рэгіёна Аляксандр Лукашэнка звярнуў увагу і на пытанні правільнага падбору кадраў, і праблему п'янства. Каб зрабіць сваю краіну сапраўды квітнеючым краем, трэба прыкладаць намаганні і падтрымліваць выканальніцкую дысцыпліну. Жыхары Беларусі здольныя на гэта, - адзначыў Кіраўнік дзяржавы.
"Глядзіце, каб мы не страцілі тое, што маем. І ўсё зараз гэта залежыць ад нас. Мы можам зрабіць сваю краіну не проста на словах квітнеючай, а квітнеючым краем. Толькі трэба галаву на плячах трымаць", - падкрэсліў Аляксандр Лукашэнка. "Не будзе дысцыпліны, будзеце шукаць аб'ектыўныя прычыны, працы не атрымаецца. Хопіць хадзіць і ныць, што мы чагосьці не можам. Будзем ныць датуль, пакуль або не перавернуць, як у Арменіі або ва Украіне, або наогул на кавалкі разарвуць. Будзе, як у 1993-1994 гадах, калі вы тут Палескую рэспубліку хацелі стварыць. Балазе, што палешукі не дурныя людзі", - адзначыў Прэзідэнт. "Думайце ўсюды. Шалёных шальных грошай няма і не будзе. Я да таго, што не гаварыце, што ў нас дурныя або яшчэ нейкія людзі, і ў нас не хапае кадраў. Усяго ў нас хапае".
Абмеркавалі на нарадзе і актуальныя пытанні эканомікі палескага рэгіёна. У прыватнасці, паднялі тэму будаўніцтва Петрыкаўскага горна-абагачальнага камбіната. Прэзідэнт Беларусі даручыў за год добраўпарадкаваць і навесці парадак і ў самім Петрыкаве па прыкладзе Жыткавічаў. На нарадзе прысутнічалі кіраўнікі абодвух райвыканкамаў. Што датычыцца рэспубліканскіх паказчыкаў, пастаўленая задача да канца цяперашняй пяцігодкі знізіць інфляцыю да 3-4% за год. Пры гэтым Кіраўнік дзяржавы падкрэсліў, што ў Беларусі зараз няма падставы для росту цэн. Важную ролю ў працы рыначнага механізму павінен іграць жорсткі кантроль пасрэднікаў.
Пасля нарады Прэзідэнт прагуляўся па цэнтральнай частцы Жыткавічаў і цёпла пагутарыў з мясцовымі жыхарамі. Добрую ацэнку атрымала добраўпарадкаванне будынка і тэрыторыі вакол сярэдняй школы. Таксама Аляксандр Лукашэнка наведаў райагратэхсэрвіс, дзе яму далажылі аб перспектывах развіцця прадпрыемства - стварэнні новых працоўных месцаў і мерах па павышэнні канкурэнтаздольнасці. Прэзідэнт агледзеў вытворчыя памяшканні, дзе рамантуецца тэхніка і навясное абсталяванне.
