Новая старонка ў гісторыі Нацыянальнага аэрапорта Мінск. Сёння тут урачыста адкрылі другую ўзлётна-пасадачную паласу. Гэта стане крокам на шляху развіцця транзітнай прывабнасці краіны.
Дзеючая траса эксплуатавалася з 1981 года. Яе рэсурс падаўжаўся неаднаразова. Наспела неабходнасць абнаўлення. Будаўніцтва другой узлёткі пачалося ў 2016 годзе. Маштабны інвестпраект рэалізавалі сваімі сіламі. Цяпер такі вопыт будзе дарэчы нашым спецыялістам пры ўзвядзенні падобных аб'ектаў за мяжой. Будаўніцтва другой узлётна-пасадачнай паласы - гэта развіццё аэрапорта як міжнароднага транзітнага вузла. Чым больш сучасных палос, абсталяваных па апошнім слове тэхнікі, тым больш самалётаў мы зможам прыняць. Новая паласа даўжынёй 3 700 метраў і шырынёй 60 метраў разлічана на паветраныя судны любога тыпу - ад самага буйнога грузавога накшталт Ан-225 да найбуйнейшага пасажырскага лайнера тыпу Airbus A380. Менавіта пасля прылёту ў гасцей пачынаецца знаёмства з Беларуссю і складваецца першае ўражанне аб краіне.
Другая паласа ўведзена ў строй якраз напярэдадні Еўрапейскіх гульняў, якія пройдуць у чэрвені, і сустракаць гасцей будзем абноўленымі. Сёння Нацыянальны аэрапорт прымае каля чатырох з паловай мільёнаў пасажыраў за год. Паток расце. Увядзенне ў строй паласы, а таксама абнаўленне аэравакзальнага комплексу, якое адбылося да чэмпіянату свету па хакеі, дазволіць сустракаць і большую колькасць людзей. К 2021 году, калі мадэрнізацыя завершыцца цалкам, разлічваюць прымаць штогод да 9 мільёнаў пасажыраў. Прэзідэнту далажылі аб планах па арганізацыі чыгуначных зносінаў сталіцы з аэрапортам і індустрыяльным паркам "Вялікі камень". Кіраўнік дзяржавы даручыў зрабіць транспартныя зносіны максімальна зручнымі для людзей і не зацягваць з рэканструкцыяй першай узлётна-пасадачнай паласы.
