У краіне неабходна яшчэ больш папулярызаваць заняткі фізкультурай і спортам, а каб здаровы лад стаў нормай жыцця, патрэбны спартыўныя аб'екты крокавай даступнасці. На гэта звярнуў увагу Прэзідэнт, наведваючы новы шматфункцыянальны фізкультурна-аздараўленчы комплекс "Мандарын" у Мінску. Прычым гаворка ідзе не толькі пра залы, але і пра будынкі на адкрытых пляцоўках, веладарожках. Такія комплексы Аляксандр Лукашэнка называе сапраўднымі фабрыкамі здароўя, падкрэсліваючы рэнтабельнасць для дзяржавы. Чым больш людзей будзе тут, тым менш у бальніцах і аптэках. Пры гэтым увагу чыноўнікаў Кіраўнік дзяржавы звяртае на неабходнасць падтрымання памяркоўных цэн на паслугі па аздараўленні. Вытворчасць айчыннага абсталявання для трэнажорных залаў будзе гэтаму толькі спрыяць. З падрабязнасцямі Вольга Макей.
Быць у добрай форме і займацца спортам - у трэндзе ў беларусаў. Зрэшты, пераканацца ў гэтым можна, зайшоўшы ў любы басейн або ФАК. У трэнажорных залах шматлюдна, плавальныя дарожкі перапоўненыя. Мабыць, нават спартыўная індустрыя не заўсёды паспявае за гэтай добрай звычкай быць здаровым. Гэты ФАК у Фрунзенскім раёне адкрыўся літаральна год таму, а абанемент практычна не дастаць.
Як і гэты комплекс, басейны Мінска загружаны на 100 %. Іх недахоп асабліва востра адчуваецца ў маладых, спальных раёнах Мінска. Пакуль у мегаполісе працуюць 10 ФАКаў, спецыялісты вызначаюць пляцоўкі яшчэ для 13 новых басейнаў. Такім чынам, магчымасць бавіць свой час за карыснай справай з'явіцца ў кожнага. Тым больш што колькасць ахвотнікаў далучыцца да спорту расце кожны год. Толькі ў Мінску за апошнія 2 гады колькасць людзей, якія рэгулярна займаюцца спортам, павялічылася ў 4 разы.
Сёння толькі ў Заводскім раёне Мінска - больш за 230 тысяч жыхароў. Гэта супастаўна з 7-м па велічыні горадам Беларусі - Бабруйскам. З'яўленне такога буйнога спартыўнага аб'екта, як "Мандарын", тут, вядома, чакалі. Дарэчы, яшчэ ў 2010 годзе падчас прэзідэнцкіх выбараў у выбаршчыкаў цікавіліся, чаго не хапае раёну. Гэты комплекс як раз вынік тых пажаданняў. Прэзідэнт заўважае, узводзіць новыя цэнтры можна і па больш простых праектах, пры гэтым якасна і зручна. Акрамя таго, цэны на паслугі павінны быць прымальнымі і для беларусаў, і для забудоўшчыкаў. Бо такая фабрыка здароўя павінна акупляцца.
Пытанне развіцця спартыўнай інфраструктуры для беларусаў - на алоўку ў Прэзідэнта. Аляксандр Лукашэнка не аднойчы нагадваў: самы эфектыўны шлях да здароўя - гэты занятак фізічнай культурай, а такія аб'екты для кожнага павінны літаральна стаць другім домам і не пуставаць ні хвіліны. Тычыцца гэта і аб'ектаў крокавай даступнасці, напрыклад, веладарожак і спортпляцовак, буйных цэнтраў, такіх як веладром або тэнісныя корты.
Кошт гэтага спартыўнага праекта - 215 мільярдаў беларускіх рублёў. А акупіцца такі комплекс за 8 гадоў, тлумачыць дырэктар. Толькі за першыя дні працы, а адкрыўся комплекс 7 лістапада, у касе ўжо больш за 3 мільярды рублёў. Згодна з прагнозамі, на працягу двух месяцаў тут пабывае дзясятак тысяч чалавек. "Мандарын" - гэта не проста традыцыйны ФАК. Гэта шматпрофільны фізкультурны комплекс. Да спартыўных і аздараўленчых паслуг тут дадаліся забаўныя - боўлінг, цір, аб'екты грамадскага харчавання. Адначасова тут могуць знаходзіцца амаль паўтысячы наведвальнікаў.
Прынцып наведвання - вельмі зручны. На ўваходзе наведвальнік атрымлівае вось такі бранзалет. Ён выконвае функцыю кашалька (можна зрабіць заказ у бары, а аплаціць потым на выхадзе). Акрамя таго, такі бранзалет больш зручны, чым ключ ад шафы, які можна згубіць.
Нягледзячы на візіт Прэзідэнта, "Мандарын" працаваў у звычайным рэжыме. Вось Аляксандр Лукашэнка нечакана падыходзіць да гардэроба. Па колькасці занятых вешалак лепш за ўсё бачна наведвальнасць.
Дарэчы, у будынку няма ні аднаго кабінета для начальнікаў - усе памяшканні тут пастараліся выкарыстаць максімальна эфектыўна. На першым паверсе памяшканне заняў салон прыгажосці.
Адметнасць "Мандарына" - аквазона. Тут, амаль як у тропіках, тэмпература паветра плюс 31 градус. Вады - 26. Дадаюць каларыту пальмы і папугаі. А пад адным дахам - цэлы СПА-комплекс: басейн на 5 дарожак, джакузі і 4 саўны.
Дарэчы, рускую лазню тут зрабілі з 200-гадовага дрэва. Хвою спецыяльна прывезлі з Карэліі. Ёсць тут фінская, міжземнаморская саўны і хамам - гэта значыць, лазня па-турэцку. За чысцінёй вады сочыць уласная служба санітарнага кантролю. Гэты комплекс шматфункцыянальны. Апроч трох басейнаў, чатырох саўн, боўлінга і залы для бокса і адзінаборстваў, ёсць тут і самая вялікая ў Беларусі трэнажорная зала. Плошча - 640 квадратных метраў. Да адкрыцця гэтага комплексу першынство было ў залы ў Мінскім аквапарку.
Кандыдат у майстры спорту па бодыбілдынгу і персанальны трэнер Вікторыя тлумачыць: у зале адначасова могуць знаходзіцца 105 чалавек. А трэнажоры знойдуцца як для тых, хто наведвае залу ўпершыню, так і для прафесійных спартсменаў.
У трэнажорную залу зазірае і Прэзідэнт. Сёння тут не толькі фітнес-пачаткоўцы, але і атлеты, якія прыйшлі на звычайную трэніроўку. Вось спартсмены з мінскага клуба майстроў плавання. Дарэчы, удзельнікамі аб'яднання могуць стаць і аматары.
У трэнажорнай зале абсталяванне ад лепшых сусветных вытворцаў. Такое абсталяванне - дарагое задавальненне. Прэзідэнт прапаноўвае беларускім прадпрыемствам падключыцца да стварэння айчынных трэнажораў. Пасля трэніроўкі спартсмены, як правіла, аднаўляюць сілы ў спецыяльным фітабары. Недахоп бялкоў і вугляводаў спецыялісты рэкамендуюць папоўніць на працягу паўгадзіны. Паспытаць карысны кактэйль прапаноўваюць і Прэзідэнту.
Тым часам у суседняй зале кіламетры намотваюць веласіпедысты. У новым цэнтры ёсць спецыяльнае абсталяванне для такіх трэніровак.
Дэманструюць Аляксандру Лукашэнку і адзіную ў Беларусі ўсталёўку для функцыянальных трэніровак.
А гэтае памяшканне завуць залай хардкора. Тут паднімаюць максімальна цяжкія штангі. Аляксандру складана прылічыць да слабога полу - яна майстар спорту па паўэрліфтынгу. На турніры ў Мадрыдзе ў канцы верасня 16-гадовая мінчанка падарыла майку Арнольду Шварцэнэгеру з фатаграфіяй Аляксандра Лукашэнкі і надпісам "Моцны прэзідэнт моцнай краіны". Сёння такую ж спартсменка прэзентавала Кіраўніку дзяржавы.
Кліентам трэнажорнай залы ўжо стаў Кірыл Шымко - адзін з наймацнейшых беларусаў. У яго арсенале тры рэкорды Гінеса. З апошніх - працягнуў вежавы кран вагой у 118 тон! Сёння атлет дэманструе трукі Прэзідэнту.
У новым фізкультурным комплексе знайшлі рэцэпт, як сумясціць спорт і адпачынак. Пасля працоўнага дня можна пакруціць педалі на велатрэнажоры, праплысці дыстанцыю ў басейне або выбіць "страйк". Боўлінг-цэнтр "Мандарына" - гэта 6 дарожак. Гэта значыць, адначасова могуць гуляць 30 чалавек. А за дзень тут гатовыя прыняць больш чым 300 наведвальнікаў.
Нягледзячы на тое, што працуе цэнтр менш як тыдзень, ужо ёсць ахвотнікі правесці тут карпаратыў. Плануецца, што боўлінг-цэнтр акупіцца за 5 гадоў. У цэлым, "Мандарын" ужо спадабаўся мінчанам. Дарэчы, перакусіць можна ў рэстаране хуткага абслугоўвання. У цэлым, убачаным сёння Прэзідэнт застаўся задаволены.
Паміж спортам і здароўем можна паставіць знак роўнасці. А спецыялісты ЮНЭСКА і зусім вывелі эканамічную формулу: 1 долар, укладзены ў фізічную культуру, дазваляе сэканоміць больш як 3 долары на медыцынскія выдаткі. Сёння ў Беларусі магчымасць займацца спортам, а значыць быць здаровым, ёсць у кожнага.
