Беларусь працягвае заставацца ў цэнтры сусветнага спорту як краіна-арганізатар буйных форумаў. Толькі "Мінск-Арэна" змяніла дэкарацыі пасля бліскучага чэмпіянату Еўропы па фігурным катанні, як час прымаць кантынентальны форум па біятлоне, крыху раней - "Гонку легенд". Сама назва гаворыць, хто да нас збіраецца прыехаць. Летам усе чакаюць самы маштабны спартыўны праект - II Еўрапейскія гульні. А ўжо сёння высветлілася, што ў сярэднетэрміновай перспектыве трэба рыхтавацца да наплыву самых думаючых спартсменаў - шахматыстаў. У 2022 годзе ў Мінску пройдзе Сусветная шахматная алімпіяда. Права правядзення гэтых міжнародных спаборніцтваў Беларусь атрымала ў кастрычніку мінулага года. На разагрэве ў яе будуць два Кубкі свету - у 2020 і 2021 гадах. Сёння кантракт на правядзенне гэтых буйных спаборніцтваў быў падпісаны ў Нацыянальным алімпійскім камітэце. А некалькімі гадзінамі раней Кіраўнік дзяржавы Аляксандр Лукашэнка правёў сустрэчу з кіраўніком Міжнароднай федэрацыі шахмат Аркадзем Дварковічам. Абмеркавалі правядзенне 45-й Сусветнай шахматнай алімпіяды ў кантэксце развіцця ў нашай краіне шахматнага спорту. З падрабязнасцямі Мікалай Стула.
Гісторыя гэтай унікальнай сям'і вядомая ўсёй краіне. Летась Зязюлькіны сталі героямі праекта Агенцтва тэленавін "Нашы дынастыі". Тата і мама пазнаёміліся, вядома, у секцыі шахмат, іх дзеці - неаднаразовыя чэмпіёны краіны, дачка і зусім чэмпіёнка свету. Нават зяць і той першаразраднік. Кіраўнік сям'і згаджаецца з тым, што дзеці, якія ўдумліва рухаюць фігуры на дошцы, асаблівыя. Рана сталеюць.
У гісторыі беларускіх шахмат шмат заслужаных людзей, але асабняком стаіць Барыс Гельфанд. У 2012 годзе ўраджэнец Мінска прэтэндаваў на сусветную шахматную карону. Ды і наогул амаль усе краіны былога СССР могуць пахваліцца такімі традыцыямі. Нядзіўна, што часцей за ўсё Алімпіяду як сярод мужчын, так і сярод жанчын выйгравала зборная Савецкага Саюза. Другое месца ў мужчын дзеляць зборныя ЗША і Расіі. У жанчын шасціразовымі чэмпіёнкамі з'яўляюцца кітаянкі, чатырохразовымі - грузінскія шахматысткі.
З развіццём Інтэрнэту змяніліся і самі шахматы. Пра іх менш згадваюць у публічным полі, усё ж канкурэнцыя за розумы сучасных дзяцей зараз значна больш жорсткая, але людзей, уцягнутых у гэту гульню, менш не стала, гавораць спецыялісты.
Падрыхтоўка шахматыстаў у Беларусі ажыццяўляецца ў 13 аддзяленнях. Займаюцца гэтым спецыфічным спортам амаль 1800 дзяцей і падлеткаў.
У кастрычніку мінулага года здарылася знакавая падзея - Беларусь выйграла права правядзення адразу трох буйных мерапрыемстваў. Калі гаварыць прасцей, Мінск на тры гады стане сталіцай сусветных шахмат. У наступным годзе ў нас пройдзе Кубак свету сярод жанчын, у 2021 - аналагічныя мужчынскія спаборніцтвы. І, нарэшце, у жніўні 2022 - Сусветная шахматная алімпіяда. Наогул гэта адзін найбуйнейшых міжнародных спартыўных форумаў у свеце. Мяркуйце самі, як мінімум 180 краін, 3000 шахматыстаў, 2000 суправаджаючых асоб.
Акрамя спаборніцкай часткі будзе прысутнічаць і палітычная. На кангрэсе ФІДЕ адбудуцца выбары прэзідэнта арганізацыі і яго савета. Прама зараз сусветныя шахматы ўзначальвае расіянін Аркадзь Дварковіч. Менавіта ён прыехаў да Прэзідэнта Беларусі падзякаваць за падтрымку і абмеркаваць будучыя падзеі.
І сёння Беларусь і ФІДЕ падпісалі афіцыйнае пагадненне аб правядзенні трох маштабных форумаў у Мінску. Так сказаць, паклалі на паперу тое, аб чым бакі дамовіліся раней. Камунікацыя паміж арганізатарамі будзе наладжана бездакорна, у гэтым сумненняў няма. Анастасія Сарокіна, якая ўзначальвае Беларускую федэрацыю шахмат, з'яўляецца віцэ-прэзідэнтам ФІДЕ.
Алімпіяда - форум маштабны, але для беларускай інфраструктуры не стане вельмі ўжо сур'ёзным выклікам, хутчэй, радавой падзеяй. Бо ўсе службы, задзейнічаныя на спартыўных мерапрыемствах, ужо з вопытам. Нядаўна да нас прыязджаў чэмпіянат Еўропы па фігурным катанні, хутка адбудуцца Еўрапейскія гульні, затым чэмпіянат свету па хакеі.
Сусветная шахматная алімпіяда - гэта камандны турнір. У складзе кожнай зборнай 4 асноўныя шахматысты і 1 запасны. Алімпіяда праводзіцца па швейцарскай сістэме ў 11 тураў, каманда-пераможца атрымлівае пераходны залаты кубак Гамільтана-Расела, а шахматысты - залатыя медалі. Аб статусе алімпіяды гаворыць той факт, што яе ўдзельнікамі былі ўсе чэмпіёны свету. Шахматы - самы ціхі спорт, эмоцыі, шум не тое што не вітаецца - гэта забаронена. Каб засцерагчы гульцоў ад падказак з трыбун (накшталт канём хадзі), тэрыторыя для гледачоў будзе асобная. Глядзець спаборніцтвы можна толькі на мультымедыйных экранах. Дарэчы, месца правядзення алімпіяды ўжо выбрана - гэта канькабежны стадыён "Мінск-Арэны".
