Новы мост паміж Жыткавічамі і Туравам павінен быць пабудаваны ўжо сёлета. Такую задачу Прэзідэнт паставіў сёння падчас рабочай сустрэчы з віцэ-прэм'ерам.
Пераправы, пабудаваныя яшчэ ў савецкія часы, сталі праблемнымі. Таму пытанне комплекснае: Аляксандр Лукашэнка даручыў звярнуць на яго асаблівую ўвагу. І ў той жа час аператыўна дзейнічаць на месцы цяперашняга здарэння: арганізаваць падвоз да Турава і Жыткавіч, каб людзі маглі нармальна дабрацца на працу. Таксама Прэзідэнт сказаў, што мае намер наведаць гэты раён вясной і пракантраляваць выкананне даручэнняў.
На сустрэчы абмеркавалі і актуальныя пытанні эканомікі. У прыватнасці, пастаўкі беларускага малака ў Расію. Паміж краінамі зноў пачаліся спрэчкі і знайсці выхад з сітуацыі - задача для ўрада.
Паводле інфармацыі Прэзідэнта, у Расію нядаўна завезлі з далёкага замежжа сухое малако, лішкі якога зараз і спрабуюць рэалізаваць на ўнутраным рынку па высокай цане. Пры гэтым прытрымліваючы беларускі - даступны для насельніцтва - прадукт. Такі падыход не павінен застацца без адказу. Паводле слоў віцэ-прэм'ера, беларускі бок ужо правяў некалькі сустрэч на пляцоўках Міністэрства сельскай гаспадаркі і ўрада Расіі. Падыходы да ўрэгулявання пытання знойдзены.
На мінулым тыдні Расія вырашыла ўвесці забарону на пастаўкі беларускай малочнай сыравіны. Эксперты звязваюць такія дзеянні з празмернасцю на расійскім рынку імпартных аналагаў з далёкага замежжа.
