Дзяржсакратар Савета бяспекі Станіславаў Зась і старшыня Дзяржпагранкамітэта Анатоль Лапо прадставілі Кіраўніку дзяржавы план па ўзмацненні абароны ўкраінскага ўчастку мяжы. Даручэнне прапрацаваць мадэрнізацыю ведамства Прэзідэнт зрабіў пасля дэталёвага аналізу сітуацыі і асабістай інспекцыі Брэсцкай пагрангрупы ў чэрвені гэтага года. Падставай для прыняцця дадатковых мер бяспекі сталі больш частыя выпадкі незаконнага трафіку зброі і боепрыпасаў менавіта на паўднёвым кірунку.
Прапановы сілавікоў па механічным пашырэнні колькасці пагранічнікаў сёння не былі падтрыманыя Кіраўніком дзяржавы. Прэзідэнт даручыў да канца года разабрацца па кожнай штатнай адзінцы і далажыць паўторна. Галоўны крытэрый: абгрунтаванасць і функцыянальнасць кожнага падраздзялення. Пры гэтым мадэрнізацыя можа весціся за кошт залішніх кіраўніцкіх, тылавых і дапаможных пасад альбо пераразмеркаваннем сілавікоў, напрыклад, з рэсурсу Узброеных Сіл так, каб не прыводзіць да істотнага росту іх агульнай колькасці ў маштабах краіны.
