Пачнем з навіны апошняй гадзіны. Прэзідэнт Беларусі падпісаў Дэкрэт № 1, якім прадугледжаны меры па садзейнічанні занятасці насельніцтва. У яго фундаменце - стварэнне максімальных умоў для працаўладкавання грамадзян, індывідуальны падыход і прынцып сацыяльнай справядлівасці.
Сістэмны дакумент вызначае і адказнасць органаў улады. Аднымі з асноўных крытэрыяў эфектыўнасці працы кіраўнікоў на месцах будуць лічыць стымуляванне працоўнай занятасці і самазанятасці, падтрымку прадпрымальніцкай ініцыятывы і забеспячэнне легалізацыі працоўнай дзейнасці. Таксама дакумент пашырае функцыі і паўнамоцтвы ўрада: будуць устанаўлівацца прагнозныя паказчыкі ў галіне садзейнічання занятасці насельніцтва і іх паквартальныя значэнні, маніторынг будзе ажыццяўляць Савет Міністраў. Вызначаць і пералік тэрыторый з напружанай сітуацыяй на рынку працы. Найважнейшая роля ў рэалізацыі дакумента - на мясцовых органах улады. Мэта - паглыбіцца ў праблемы кожнага непрацуючага чалавека і дапамагчы ў працаўладкаванні. Таму асаблівы акцэнт - на індывідуальны падыход. Варыянты розныя: перанавучанне, часовае месца працы і іншыя механізмы. Каардынаваць працу па рэалізацыі дэкрэта будуць пастаянна дзеючыя камісіі на месцах, у склад якіх увойдуць дэпутаты, спецыялісты сфер працы і сацабароны, ЖКГ, унутраных спраў, а таксама прадстаўнікі рэспубліканскіх аб'яднанняў.
У новы дэкрэт не ўвайшлі нормы аб збіранні з працаздольных непрацуючых грамадзян збору на фінансаванне дзяржвыдаткаў. Пры гэтым асобы, якія раней прызнаваліся плацельшчыкамі гэтага збору, вызвалены ад яго выплаты. Дэкрэт прадугледжвае канцэптуальна іншы падыход, накіраваны на стымуляванне працаздольных непрацуючых грамадзян да легальнай занятасці.
З 1 студзеня 2019 года такія асобы будуць ажыццяўляць аплату паслуг, што субсідзіруюцца дзяржавай, па іх поўным кошце. Канкрэтны пералік такіх паслуг даручана вызначыць ураду.
Дэкрэт уступае ў сілу пасля яго афіцыйнага апублікавання.
Падрабязнасці аб падпісаным дакуменце, а таксама каментарыі экспертаў і спецыялістаў - сёння ў "Панараме".
