Фінансавая палітыка Нацбанка накіраваная на захаванне стабільнасці. Пра гэта сёння заявіў Прэзідэнт Беларусі на сустрэчы са старшынёй праўлення галоўнага фінансавага рэгулятара.
Павел Калаўр паведаміў Аляксандру Лукашэнку пра сітуацыю на фінансавым рынку. Літаральна ўчора гэтыя звесткі былі апублікаваныя для шырокай грамадскасці. За апошні год атрымалася дамагчыся стабільнасці на валютным рынку. Цяперашняя грашова-крэдытная палітыка Нацбанка адпавядае пастаўленай мэце па інфляцыі - да канца года чакаецца абмежаванне лічбы ў межах 5 %. Фарміраванне спрыяльнага асяроддзя для ўстойлівага развіцця эканомікі - ключавая задача Нацбанка. Адказнасць за фінансавую стабільнасць ускладзеная на старшыню праўлення. Аднак, на думку кіраўніцтва рэгулятара, традыцыйных інструментаў грашова-крэдытнай палітыкі і банкаўскага нагляду можа быць нядосыць. Таму прапаноўваецца пашырыць паўнамоцтвы Нацбанка і замацаваць яго адказнасць у гэтай сферы. А таксама заканадаўча адрасаваць аналагічную задачу рэспубліканскім органам дзяржкіравання.
На сустрэчы таксама абмяркоўваліся магчымыя фарматы правядзення мерапрыемстваў да 25-годдзя беларускага рубля. Нацыянальны банк сумесна з Саветам Міністраў маюць намер распрацаваць стратэгію па павышэнні даверу да нацыянальнай валюты. У планах - выданне абноўленага каталога банкнот і манет Беларусі. А для журналістаў арганізуюць экскурсію ў цэнтральнае сховішча Нацбанка.
