Прэзідэнт Беларусі і губернатар Курганскай вобласці абмеркавалі перспектыўныя праекты

13 Кастрычніка 2016

Беларусь і Курганская вобласць Расіі, кажучы мовай эканамістаў, пачынаюць "з нізкага старту", але "мяжы росту" для гандлю, інвестыцый, кааперацыі і абмену тэхналогіямі не маюць.

Менавіта аб перспектыўных праектах канкрэтна і падрабязна гаварылі сёння Прэзідэнт Беларусі і губернатар з Заўралля. Ключавых пазіцый некалькі. Па-першае, вобласць як жытніца зацікаўлена ў нашых агратэхналогіях, вопыце ўкаранення сацыяльных стандартаў на сяле, тэхніцы і кадрах.

Па-другое, эканомікі рэспублікі і вобласці роднасныя ў машынабудаванні, выпуску прадуктаў харчавання і складаных тэхналогіях. Галоўная задача, на думку бакоў, - не распаўсюджваць штучную канкурэнцыю, не ствараць новыя паралельныя вытворчасці, а запускаць сумесныя праекты. Напрыклад, па вытворчасці ліфтаў, аўтамабільнай спецтэхнікі на базе МАЗа, будаўніцтве дарог, жылых кварталаў і прадпрыемстваў "пад ключ", а таксама ў медыцыне і фармацэўтыцы. Губернатар такі падыход цалкам падзяляе, а галоўная просьба да Прэзідэнта - каб услед за якаснай тэхнікай у Курганскай вобласці аператыўна з'яўляліся і сэрвісныя цэнтры.

Аляксей Какорын, губернатар Курганскай вобласці Расіі: "Я абсалютна згодны з усімі тымі кірункамі, якія вы назвалі. Ёсць, вядома, праблемы. У прыватнасці, у нас значна прасеў рынак збыту вашых трактароў. Нас гэта не задавольвае, таму што яны вельмі запатрабаваны нашымі аграрыямі, мы ў вобласці даволі вялікую колькасць трактароў закуплялі. Але апошнім часам цалкам адсутнічае сэрвіснае абслугоўванне, у сувязі з гэтым ёсць некаторыя цяжкасці. З нашага боку ёсць прапанова нашым прадпрыемствам на дагаворных умовах адкрыць сэрвіснае абслугоўванне ў вобласці. Тым самым мы б закрылі патрэбнасць Уральскай федэральнай акругі і аднавілі рэалізацыю трактароў "Беларус".

Ужо падчас сустрэчы Прэзідэнт даў жорсткае даручэнне міністру прамысловасці і віцэ-прэм'еру Уладзіміру Сямашку, які курыруе галіну, у самыя кароткія тэрміны вырашыць праблему сэрвіснага абслугоўвання. Прапановы партнёраў па фармацэўтыцы таксама будуць вывучаны ў вельмі кароткія тэрміны. Падштурхнуць кааперацыю і канкрэтныя праекты губернатар зможа асабіста. У планах Аляксея Какорына - наведванне буйных беларускіх аграрных і прамысловых прадпрыемстваў. Сёння губернатар наведаў холдынг спецтэхнікі "Амкадор".