Альтэрнатыва аграгарадкам, рэканструкцыя малочнатаварных ферм па прынцыпе каруселі і ход пасяўной кампаніі. Прэзідэнт Аляксандр Лукашэнка сёння здзейсніў рабочую паездку ў Мінскую вобласць. Пра новую стратэгію беларускіх аграрыяў - рэпартаж Ілоны Красуцкай.
Лэдзі-бос Ніна Жалязнова - аграрый са стажам. У сельскай гаспадарцы больш за 30 гадоў, з іх 10 у якасці кіраўніка. Яе прадпрыемства "Азярыцкі-Агра" - адно з лепшых у вобласці. Валоданні, а гэта 9 000 гектараў, знаходзяцца каля легендарнага сімвала Перамогі - Кургана Славы. Сяўба ярыны тут набліжаецца да фіналу - 75%. Прычым за якасцю гэтай кампаніі ў поле сочаць не толькі людзі, але і камп'ютары.
Паўтысячы супрацоўнікаў, большая частка - мужчыны. Роля жалезнай лэдзі сярод такой колькасці мужчын Ніне Жалязновай звыклая. Гэтая сустрэча з Кіраўніком дзяржавы другая. Падчас мінулага візіту 4 гады таму Аляксандр Лукашэнка паставіў некалькі задач. Усе выканалі.
Сёлета беларускія аграрыі памянялі тактыку. Але справа не толькі ў гэтай ранняй вясне, а ва ўстойлівасці культур да капрызаў надвор'я. У гэтым дачыненні падчас леташняй уборачнай Прэзідэнт даў некалькі даручэнняў. Адно з іх - перагледзець гатункі, якія выкарыстоўваюцца, і адмовіцца ад загадзя стратных, якія, напрыклад, у будучыні дадуць нізкую ўраджайнасць. Акрамя рэкамендацый ад Мінсельгасхарча, у "Азярыцкім-Агра" паставілі і ўласны эксперымент. Вызначылі дэмаполе. У гэтай гульне ўдзельнічаюць беларускія і нямецкія гатункі збожжавых. На календары толькі сярэдзіна красавіка, але фаварыт, здаецца, вызначыўся.
Новая стратэгія гэтым разам і ў сталічнага рэгіёна. Змянілі структуру кармавых палёў. У кукурузы зараз таксама з'явіўся канкурэнт - бабовая трава.
Саджаць бульбу тут пачалі літаральна ўчора. План - амаль тры сотні гектараў. У пачатку жніўня плануюць пакаштаваць новы ўраджай. Перспектыўны гатунак ацэніць і Прэзідэнт.
У комплексе прадпрыемства 5 малочнатаварных ферм. Амаль 100% малака - класа "экстра". Адна з рабатызаваных ферм працуе па прынцыпе каруселі.
За паўгадзіны каровы ў сярэднім робяць 18 кругоў. Штогод кожная прыносіць каля 8 000 кілаграмаў малака.
Асноўны спажывец беларускага малака па-ранейшаму Расія. Аднак праграма дыверсіфікацыі разлічаная на рынкі трэціх краін. Пробную партыю - 20 тон малака - учора адправілі ў Кітай. Частыя візіты расійскіх губернатараў, відавочна, паспрыялі павелічэнню паставак. Малочныя рэкі паплывуць і на Далёкі Усход.
Прэзідэнт сёння гаварыў і пра новую тактыку развіцця сяла. У дадатак да аграгарадкоў Аляксандр Лукашэнка прапаноўвае вызначыць у кожным раёне па некалькі перспектыўных вёсак і забудоўваць іх даступным для вяскоўцаў жыллём.
Дзяржава, у сваю чаргу, падтрымае домабудаўнічыя камбінаты і сельскіх жыхароў. Праўда, ёсць адна ўмова.
Ёсць у гэтай гаспадарцы сёе-тое для здароўя і душы. Некалькі гадоў таму ў маляўнічым бары каля вёскі Сасновай з'явіўся аздараўленчы цэнтр. Задумваўся ён як база адпачынку для працаўнікоў "Азярыцкага-Агра". І справа пайшла. Так сацыяльны праект стаў прыбытковым.
Аляксандра Лукашэнку сустракаюць хлебам-соллю і прапаноўваюць агледзець інфраструктуру. 4 жылыя дамы, лазня, рэстаран, 2 азёры і рыбалка. З 2012 года "Сасновае" наведалі амаль 4 000 чалавек. На сталай аснове адпачываюць экіпажы вядомых авіякампаній.
У праект развіцця аграсядзібаў Белаграпрамбанк уклаў сорак два мільярды рублёў. Банкір Анатоль Лысюк не шкадуе, гаворыць, грошы працуюць. Толькі летась тыя, каго пракрэдытавалі, прынялі звыш 100 000 гасцей і зарабілі дваццаць шэсць мільярдаў рублёў.
Каля велікоднага стала тэму нацыянальнай ежы Прэзідэнт вывеў на дзяржаўны маштаб. Асартымент сеткі Кіраўніку дзяржавы паказалі тут жа. Аляксандра Лукашэнку павіншавалі з Хрыстовым Уваскрэсеннем.
Лічыцца, што кіраўнік у сельскай гаспадарцы - мужчынская прафесія. Тым прыемней Кіраўніку дзяржавы было бачыць выключэнні з правіла. Гаспадарка Ніны Жалязновай сярод перадавых. "Азярыцкі-Агра" - узор, да якога трэба імкнуцца, лічыць Прэзідэнт, і як мага хутчэй.
