Такім чынам, стратэгія развіцця краіны на найбліжэйшы год вызначаная. Галоўныя прынцыпы, па якіх трэба будзе працаваць, агучаныя Кіраўніком дзяржавы ў Авальнай зале. Сённяшняе выступленне Прэзідэнта з праграмнай прамовай перад членамі абедзвюх палат парламента і адрасаванае да ўсёй нацыі стала ўжо дваццатым. Дарэчы, такі фармат зносін прадугледжаны Асноўным законам і з'яўляецца канстытуцыйным абавязкам Кіраўніка дзяржавы. Прамова Аляксандра Лукашэнкі закранула літаральна ўсе тэмы без выключэння. Эканоміка, культура, сацыяльная сфера, знешняя палітыка. Максімум канкрэтыкі і нацэленасць на вынік. Асноўным і самым маштабным блокам у Пасланні, як і чакалася, стала эканоміка. І, як падкрэсліў Кіраўнік дзяржавы, гэты год павінен стаць пераломным. 2016-ы будзе сур'ёзным іспытам для ўсіх структур улады. Стаўка - на эфектыўныя метады кіравання, прагматычны падыход у гаспадаранні, падтрымку прыватнай ініцыятывы. Асаблівая місія адведзеная заканадаўцам - ад іх чакаюць прыняцця эфектыўных законаў, якія б спрыялі прыцягненню прамых замежных інвестыцый. Высокія тэхналогіі, неабходнасць новых падыходаў у аплаце працы. Гэта толькі некаторыя тэзісы Паслання. Больш падрабязна аб задачах на найбліжэйшую перспектыву і стратэгіі развіцця на пяцігоддзе - Наталля Брэвус.
Такім чынам, галоўнае сказана. Ад традыцыі звяртацца вось так напроста да жыхароў краіны не адыходзіць Прэзідэнт Беларусі ўжо два дзясяткі гадоў. У гэты дзень гучаць ключавыя моманты беларускай палітыкі, жыцця. Ёміста і па справе.
У кулуарах Авальнай залы было шматлюдна. Гэтая раніца стала рэкорднай па колькасці поціскаў рукі! Усё-такі больш як 400 запрошаных - дэпутаты, сенатары, міністры, топ-менеджары, дыпламаты. Зрэшты, Прэзідэнт адчувае сябе тут як рыба ў вадзе! Менавіта з парламенцкай трыбуны пачынаўся шлях Лукашэнкі-палітыка! Да пачатку - зносіны з кіраўніцтвам парламента і прэм'ер-міністрам. Гэта магчымасць зверыць гадзіннікі. Такія кадры за пару хвілін да старту штогадовага звароту да краіны мы бачым упершыню! З чаго пачынаецца прэзідэнцкая прамова гэтым разам? З унутраных пытанняў і эканомікі. Вялікая стратэгія яшчэ будзе агучаная на Усебеларускім народным сходзе. А гэты год будзе асаблівым - ён пройдзе пад знакам парламенцкіх выбараў і культуры. Але галоўнае - у 2016-м стартуе новы этап пяцігадовага развіцця.
Усе рашэнні ў эканоміцы прынятыя. 78-ы указ - прамое кіраўніцтва да дзеяння! Прэзідэнт робіць акцэнт на фактарах росту і рэзервах для развіцця. Паніжэнне на чвэрць выдаткаў, вытворчых расходаў, адмова ад пасрэднікаў і шэрых схем.
Але што яшчэ? Развіццё супрацоўніцтва з МВФ і Сусветным банкам. Інвестыцыі і новыя праекты для краіны. Пад кітайскія рэсурсы яшчэ дагэтуль не сфарміраваны партфель прапаноў - гэта абурае Кіраўніка дзяржавы! Своечасова зарыентаваліся па экспарце - дыверсіфікаванне працягнецца. Пры гэтым вялікая ўвага пытанням стварэння працоўных месцаў - гэта зона адказнасці губернатараў. На тэму занятасці шматлікія сёння спрабуюць спекуляваць.
Беларусі патрэбныя не проста сучасныя вытворчасці, а тыя, дзе ўся сутнасць у навуцы і тэхналогіях. Гэта такія праекты і сферы, як космас, індустрыяльны парк, атамная станцыя. Вось на чым можна будаваць эканоміку ведаў.
Дзяржава абараняе і будзе абараняць правы, уласнасць і годнасць усіх прадпрымальнікаў, якія сумленна вядуць сваю справу. Але мы маем права чакаць няўхільнага выканання законаў, выхаду з ценю і адмовы ад нявыплаты падаткаў.
Падчас Паслання прагучалі зусім канкрэтныя даручэнні. Глабальнае патрабаванне да ўрада і Нацбанка - забяспечыць макраэканамічную стабільнасць. Для грашовай сферы актуальны прынцып 2Д - дэдаларызацыя і дэнамінацыя.
Прамову Прэзідэнта не раз перапынялі апладысментамі. Напрыклад, калі Аляксандр Лукашэнка гаварыў пра тое, што ў чалавека павінна быць магчымасць зарабіць і ўтрымліваць сям'ю. Так зрэагавала зала і тады, калі Прэзідэнт дакладна даў зразумець - нягледзячы на эканамічныя цяжкасці, не адыдуць у Беларусі ад прынцыпаў сацыяльнай дзяржавы.
Сацыяльны блок ішоў адразу пасля эканамічнага. Зразумела - намаганні па развіцці эканомікі для таго, каб людзі жылі нармальна. Што тут? Хоць у сусветным рэйтынгу па доступе да медыцынскіх паслуг Беларусь займае першае месца, але яшчэ шмат трэба зрабіць. Ды банальна - чэргі з паліклінік павінны знікнуць. Добра, што сціснуліся дэмаграфічныя нажніцы. Гэта радуе. Кропкавая дапамога шматдзетным сем'ям прадоўжыцца, як і ў цэлым інвестыцыі ў сям'ю. Рэзанансная тэма апошніх тыдняў - павышэнне пенсіённага ўзросту.
Амаль тры дзясяткі разоў Прэзідэнт адрываўся ад папер, каб растлумачыць або дапоўніць падрыхтаваныя тэзісы. У гэтым увесь беларускі лідар. Адразу некалькі такіх выказванняў тычыліся адукацыі. Прыкметна - набалела. Ускалыхнуць настаўніцтва. Перагледзець крытэрыі зарплат у гэтай сферы, займацца падрыхтоўкай падручнікаў - зразумелых і актуальных. Слепа не капіраваць еўрапейскую сістэму адукацыі, а ўдасканальваць сваю.
Беларускі лідар асобна гаварыў пра кадравую палітыку. Патрэбны маладыя і таленавітыя кіраўнікі, пастаянная ратацыя кадраў. Высокую ацэнку атрымала праца парламента. Заключны блок выступлення - пра знешнюю палітыку. Калі проста - Беларусь не будзе выбіраць паміж Захадам і Усходам. Расія як учора, так і сёння - стратэгічны партнёр. Галоўнае - прытрымлівацца саюзніцкіх прынцыпаў па-сумленнаму.
Гэта Пасланне праходзіць на фоне складанага міжнароднага становішча, калі на першы план выходзяць пытанні бяспекі. На гарызонце ў свеце замаячыў прывід халоднай вайны, блокавае супрацьстаянне набірае абароты. З асаблівай шчырасцю Прэзідэнт гаворыць аб каштоўнасці спакойнага жыцця.
У гэтай сітуацыі ў Беларусі перагледжана ваенная дактрына. Імідж мірнай дзяржавы шчыльна замацаваўся за краінай. Але порах заўсёды трэба трымаць сухім.
Кіраўнік беларускай дзяржавы, працуючы над Пасланнем, ставіў мэту, каб яно было максімальна канкрэтным і лаканічным. Атрымалася! 90 хвілін, напэўна, адно з самых кампактных выступленняў у Авальнай зале. Пасланне 20.16 - гэта стратэгія, арыенцір на найбліжэйшы год для органаў улады, кіраўнікоў прадпрыемстваў.