У першы дзень новага навучальнага года Прэзідэнт наведаў школу № 93 г. Мінска
Атрымліваць у школе максімум ведаў – такую параду вучням даў сёння Прэзідэнт Беларусі, адкрываючы ў адным са сталічных мікрараёнаў новую школу. Вітаючы гасцей свята, Аляксандр Лукашэнка падкрэсліў, што месца, дзе размясцілася навучальная ўстанова, звязана з яго асабістымі ўспамінамі. Гэтая новабудоўля - падарунак мікрараёну Вялікі Лес, названаму ў гонар герояў, якія абаранілі сваю зямлю ў гады Вялікай Айчыннай вайны.Новае пакаленне сёння працягвае слаўную гісторыю, але ўжо ў мірным жыцці. І ўрачыстай лінейкай тут пачаўся не толькі навучальны год, а і гісторыя новай школы. Аляксандр Лукашэнка, звяртаючыся да вучняў, нагадаў важнае правіла жыцця: залог паспяховай будучыні - гэта стараннасць і руплівасць.
Кіраўнік дзяржавы асаблівую ўвагу звярнуў на дысцыпліну ў школах
Нягледзячы на святочны настрой, не абмінулі і надзённыя праблемы. Адукацыйны працэс у Беларусі пастаянна ўдасканальваюць: больш сучаснымі сталі падручнікі і методыкі выкладання. Асаблівую ўвагу зараз неабходна звярнуць на парадак. Кіраўнік дзяржавы канстатаваў, што дысцыпліна ў школе вельмі ўпала.Пасля слоў на дарогу вучням, іх бацькам і педагогам Аляксандр Лукашэнка ўрачыста ўручыў сімвалічныя ключы дырэктару школы. Затым разам з ёй і кіраўніком горада перарэзалі чырвоную стужку. А школьны званок сімвалізаваў пачатак навучальнага года.
