Усім вядома, што сельскай гаспадарцы Аляксандр Лукашэнка надае вялізную ўвагу. Развіццё аграрнай галіны ў цэлым на пастаянным кантролі Кіраўніка дзяржавы. Акрамя таго Прэзідэнт і асабіста праводзіць эксперыменты, каб быць у курсе апошніх тэндэнцый галіны, выпрабаваць тэхналогіі і новыя віды культур. Пасля, зразумела, лепшыя і самыя паспяховыя з напрацовак укараняюцца ў жыццё ўжо масава.
Традыцыйна апрабоўвае Кіраўнік дзяржавы самыя розныя віды сельскагаспадарчых культур. У той жа час кантроль і догляд пасеваў ажыццяўляюць вучоныя Навукова-практычнага цэнтра Нацыянальнай акадэміі навук па бульбаводстве і плодаагародніцтве. Напрыклад, пшаніца на прэзідэнцкім эксперыментальным полі сёлета дала ўраджай 92 цэнтнеры з гектара! Што да нарыхтоўкі кармоў, знятыя былі тры выдатныя ўкосы травы.
Апрабоўвае Прэзідэнт і вырошчванне садавіны і ягад, якія яшчэ з дзясятак гадоў таму ў Беларусі называлі экзатычнымі. Кавунамі ў нашай краіне сёння ўжо наўрад ці кагосьці здзівіш, вырошчваюць у нас і дыні. Сёлета насенне бахчавых прывезлі з Узбекістана. Па просьбе беларускага лідара яго калега і сябар Шаўкат Мірзіёеў даслаў лепшае насенне ўзбекскіх дынь. Літаральна некалькі дзён таму яны пакінулі прэзідэнцкую цяпліцу.
Гэтак жа ўважліва (хоць і дыстанцыйна) назірае Прэзідэнт за садам дружбы Беларусі і Таджыкістана. І гэта таксама былі дамоўленасці двух кіраўнікоў дзяржаў - Аляксандра Лукашэнкі і Эмамалі Рахмона, у выніку якіх з Цэнтральнай Азіі ў Брэсцкую вобласць былі прывезены 6 тысяч саджанцаў абрыкосаў, чарэшні, яблыкаў і некалькі лепшых сартоў вінаграду.
Ураджайнасць бульбы - больш за 600 ц/га.
Пачалася гэтымі днямі на прэзідэнцкіх палях уборка бульбы розных сартоў. Як толькі дазваляе надвор'е і насычаны графік, Кіраўнік дзяржавы асабіста ў полі. А разам з ім і ўсе тыя, каго больш звыкла на працягу тыдня бачыць у дзелавых касцюмах. Тыя, хто ў штодзённым рэжыме працуе разам з Прэзідэнтам. Ну і, вядома, з улікам аб'ёмаў прыходзяць на дапамогу і спецыялісты. Ураджай бульбы сёлета без перабольшання ўражвае. На сённяшні дзень з прэзідэнцкіх палёў ужо сабрана больш за 120 тон. І гэта яшчэ далёка не канчатковая лічба. Сабраць плануецца практычна ўдвая больш. Напярэдадні была сабрана бульба сартоў "брыз" і "мастак". Абодва беларускай селекцыі. Ураджайнасць больш за 600 цэнтнераў з гектара. Гэта значыць амаль удвая пераўзыходзіць сярэдні паказчык па рэспубліцы.
Як бачым, атрымліваць высокія ўраджаі можна пры любых (нават самых капрызных) умовах надвор’я. Залог поспеху, як паказвае практыка, - дакладная арганізацыя працы, гаспадарскі падыход і няўхільнае выкананне тэхналогій.
Поўным ходам ідзе ўборка ўраджаю на эксперыментальных палях Прэзідэнта
23 сентября 2019