Падрыхтаваць кваліфікаваныя кадры і на гэтай аснове развіваць тавараабарот, прасоўваць цесную прамысловую кааперацыю і буйныя інвестпраекты. Такую ўзгодненую на вышэйшым узроўні перспектыву акрэсліў сёння Прэзідэнт Беларусі на сустрэчы з прэм'ер-міністрам Грузіі. Перамовы завяршыліся крыху больш за гадзіну таму і сталі працягам маштабнага пакета пагадненняў і ініцыятыў, якія напярэдадні ў Тбілісі абмяркоўвалі лідары краін. У прыватнасці, выйсці на падваенне тавараабароту да 200 мільёнаў долараў і напоўніць пакет кантрактаў праектамі ў машынабудаванні, сельскай гаспадарцы і фармацэўтыцы. Аляксандр Лукашэнка падкрэсліў, што беларускія ініцыятывы сустракаюць аператыўную і ўсебаковую падтрымку з грузінскага боку.
Рабочы графік другога дня афіцыйнага візіту Прэзідэнта Беларусі ў Грузію вельмі насычаны. Сёння раніцай беларускі лідар усклаў вянок да мемарыяла героям, загінуўшым за адзінства Грузіі. На белым мармуры імёны грузінскіх воінаў, якія загінулі ў канфлікце ў пачатку 90-х, а перад скульптурай - Вечны агонь. Беларусь і Грузію аб'ядноўвае трапяткія адносіны да гісторыі і традыцый служэння Айчыне, што і падкрэсліла ўрачыстая цырымонія.
Пасля ўскладання прайшла сустрэча Аляксандра Лукашэнкі з Каталікосам-Патрыярхам усяе Грузіі Іліёй II. Патрыярх - адзін з самых паважаных і ўплывовых грамадскіх дзеячаў. Да яго слоў прыслухоўваюцца палітыкі і бізнесмены, а таксама абсалютная большасць грузін не толькі краіны, але і ў дыяспары па ўсёй планеце. Аўтарытэт Іліі II таксама высокі ва ўсім хрысціянскім свеце. Кіраўнік Беларусі падкрэсліў каштоўнасць пазіцыі Патрыярха для развіцця беларуска-грузінскіх адносін і падзякаваў за магчымасць рэгулярнага абмену меркаваннямі.
У гэтыя хвіліны візіт Прэзідэнта Беларусі ў Грузію працягваецца. Кіраўнік дзяржавы дае вялікае інтэрв'ю грузінскім журналістам. У прыватнасці, лідар адзначыў, што пасля выбараў у Расіі ён абмеркаваў з Уладзімірам Пуціным ключавыя вострыя пытанні. У палітыцы супярэчнасцяў няма, а ў эканоміцы складаныя пытанні вырашаюцца, часам і з падключэннем прэзідэнтаў. У цэлым Аляксандр Лукашэнка разлічвае на пазітыўнае развіццё беларуска-расійскіх адносін падчас новага прэзідэнцкага тэрміну Уладзіміра Пуціна. Падрабязнасці другога дня афіцыйнага візіту Прэзідэнта Беларусі ў Грузію - у нашых наступных выпусках.
