Узаемаадносіны адпавядаюць добрасуседскім. Беларусь і Латвія маюць намер пашырыць супрацоўніцтва. Кіраўнік дзяржавы сёння сустрэўся з міністрам замежных спраў гэтай краіны.
За сваю 8-гадовую дыпламатычную кар'еру ў якасці кіраўніка латвійскага Міністэрства замежных спраў Эдгарс Рынкевічс часта быў у Мінску, ды і з беларускім прэзідэнтам бачыцца не ўпершыню. Цяперашні візіт трохдзённы, высокі госць ужо паспеў перш правесці перамовы ва ўрадзе і знешнепалітычным ведамстве. І шэраг заяў аб тым, што Рыга гатовая павышаць якасць двухбаковых адносін, гаворыць аб планавым паскарэнні супрацоўніцтва. Апошнім часам палітычны дыялог ідзе па нарастальнай - гэта дае станоўчы эфект узаемнаму гандлю. Летась ён перавысіў паўмільярда долараў, але патэнцыял куды большы. Кантакты паміж краінамі зараз, сапраўды, вельмі імкліва развіваюцца на міжведамасным узроўні. Ідзе актыўны парламенцкі дыялог. Радуе і супрацоўніцтва рэгіёнаў. Колькасць пар гарадоў-пабрацімаў дасягнула 60. Вось так, ва ўсіх сэнсах па-суседску, Латвія зацікаўленая таксама ў нармалізацыі адносін Беларусі з Еўрасаюзам і актыўна спрыяе наладжванню гэтага дыялогу.
Кіраўніка беларускай дзяржавы чакаюць у Рызе - падрыхтоўка візіту працягваецца. Нядаўна Латвія выбрала новага прэзідэнта. Вядома, пачынаць з нуля не прыйдзецца, але ўсё-такі асновай сустрэчы на вышэйшым узроўні павінен быць добры эканамічны фундамент і пэўныя праекты - дадатковы стымул для развіцця адносін. Арыенцір ёсць, бо ў лепшыя гады тавараабарот Беларусі з Латвіяй стабільна перавышаў мільярд долараў. Ну а яшчэ больш Мінск і Рыгу аб'яднае спартыўная падзея - у 2021 годзе дзве сталіцы будуць прымаць сусветны чэмпіянат па хакеі.
